Yohané 9 - NTSHOB NSI

Neyate mèn ze bo bwe i mfùmiag là

¹ Yésu be tshùa njen mo' mèn bo na' mbwe i mfùmiag là.

² Ghazi'te nu i bètt'é ntshob ndù: Rabbi, we z'a ghù nukebwô à, yi ke tàab mba màab ndù bo bwe i mfùmiag à?

³ Yésu bùnte ndù: Ke yi, ke tàab, ke màab lo ke' ghù nukebwô, là, a b'a ndù mfa' Nsi tswite wul i num i.

⁴ Mb'a ke' à mbwôgtshù là, a bwô ndù be fa' mfa' mèn z'a tum àm nà; tèttswe' tshwèt nse'e, ngelaṅ ze sàm mèn ke' ku'ni nefa' là.

⁵ Mba me ke' à ntùm njù là, me b'a nka' njù.

⁶ A tshob ndùlala ntôg ntsi num tsha'a, ntébte netob ntsi mi, njab netob num miag mfùmiag,

⁷ ntshob yi ndù: Nèn nsôg wul o ntùm dù' ntse Siloé (yen nà bagt'a ndù: Ngantum). A nèn nsôg wul i, mbe bèn njam, nke njene.

⁸ Ba ndùla' mba ben tse bo ke njen i njoṅ ndù fa, nummbe a na' mb'a ngalon ndone là, nke ntshob ndù: A ke mèn z'a ke ntswe nsi, nke ndon ndon ni ké?

⁹ Tsemo' ben tshob ndù: A b'a yi, tsemo' bèn ntshob ndù: Nga, là, a nefut'é. Tu wul i tshob ndù: A b'a kua' me.

¹⁰ Ndùlala bo tshob yi ndù: Miag mu ghù à ndùke kà nké't'à?

¹¹ A bùnte ndù: A b'a mèn ze bo ke ntsiaṅ i Yésu là bèn ntébte netob njo' miag màm yi, ntshob me ndù: Nèn Siloé nsôg wul o, ndùlala me nèn nsôg wul àm kà njene.

¹² Bo tshob yi ndù: A b'a yà? A tshob ndù: Me ke' lèn.

¹³ Bo lo' mèn z'a na' mbe mfùmiag là nèn yi mbwe ba Férésia.

¹⁴ Là, a na' mb'a lé'njù Sabbat ze Yésu tébte netob, nga' miag mi yi là.

¹⁵ Ndùlala ba Férésia bètt'é yub yoṅ i mb'a ghù kà njen nà. Là, a tshob bo ndù: A lo njab netob num miag màm, me sôg wul àm kà nke njene.

¹⁶ Ndùlala tsemo' ba Férésia nke ntshob ndù: Yen mèn nà ke fe à Nsi nummbe a ke tshwèt nze Sabbat. Là tsemo' bèn nke ntshob ndù: A be ngaghù nukebwô ku'ni neghù lèn tshen nsà l'a ndùke? Là fagte lo vù netèt bo.

¹⁷ Ndùlala bo bèn ntshob mfùmiag mo' yoṅ i ndù: Tu wul o, o tshob yu ndù ke num i mb'a gha' miag mu à? A tshob ndù: A b'a mo' ngatshob ntshob Nsi.

¹⁸ Là ba Yuda ke bam ndù a lo be mfùmiag kà mbèn njene, kà nkum ngelaṅ bo tsiaṅ tà mba mà mfùmiag z'a yen nà.

¹⁹ Bo bètte yub ntshob ndù: Yen mén ni b'a mén zin ze bin num ntshob ndù bin lo bwe i mfùmiag là ké? A b'a ndùke k'a nke njen ndonni à?

²⁰ Là tàab mba màab bùnte ntshob ndù: Bag lèn ndù a b'a kua' mén yag, mba ndù bag lo bwe i mfùmiag.

²¹ Là, mbe se' mba mb'a tshwèt njen ndonni là, bag ke' lèn; mbèn mbe se' mba mèn z'a gha' miag mi là, bag ke' lèn. Bin bètt'é, à be mènntùn, a nsi tshob nu num tu wul i.

²² Tàab mba màab tshob ndùlal'a nummbe bo lo ke mbwôg ba Yuda; nummbe a lo be be ndù ba Yuda à nabte ndù mba we lo z'a nsi tshob ndaṅndaṅ ndù Yésu b'a Kristô là mba bo a' sô i ntùm sinagogue.

²³ A num ndùlala ze Tàab mba màab na' ntshob ndù: A be mènntùn, bin bètt'é là.

²⁴ Num mbatte yoṅ bàa, bo tsiaṅ mèn z'a na' mbe mfùmiag là, ntshob yi ndù: Fà ghamte Nsi! Bag lèn ndù yen mèn nà b'a ngaghù nukebwô.

²⁵ Ndùlala yen mèn ni bùnte ndù: A be z'a b'a ngaghù nukebwô là mba me ke' lèn; me lèn nda' nu ntshù' ndù: Me lo be mfùmiag, ndonni me tshwèt njene.

²⁶ Ndùlala bo tshob yi ndù: Ke z'a lo ngù wù à? A ghù à ndùke kà nga' miag mu à?

²⁷ A bùnte bo ndù: M'a tshob bin, bin ke ju'. Bin bèn nke nkô neju' à ke? Mo' ndù mba bin zin tshwèt nkô netù' ghazi'te nu i.

²⁸ Bo so ndon tu i, ntshob ndù: O bèn mbe ngazi'te nu yen mèn nà, là bag b'a ghazi'te nu Mosé.

²⁹ Bag lèn ndù Nsi lo tshob nu Mosé, mbe se' mba yen mèn nà là, bag ke' lèn dù' z'a be mèn bwe là.

³⁰ Mèn nà bùnte ntshob bo ndù: A yen nà bèn mbe nu netshàme, bin ke' lèn dù' z'a be mèn bwe là, là mbe ndù a gha' miag màm!

³¹ Be lèn ndù Nsi ke' be ju' ghaghù nukebwô, là, a be ze mèn ghamte Nsi là, mba Nsi a' ju' i.

³² Fe ndù ke lo bo ke' to' yoṅ nju' ndù mèn gha' miag mèn ze bo bwe i mfùmiag là!

³³ A lo mbe ndù yen mèn ni ke' fe à Nsi, mb'a ke' ku'ni neghù sàm ju.

³⁴ Bo bùnte ntshob yi ndù: Njoṅ wul o fa bo bwe i à ntùm nukebwô, o tshwèt ntswite yag ké? Bo ma' i njù.

³⁵ Yésu ju' ndù bo ma' i njù, mbe yen i, ntshob yi ndù: O bam Mén mèn ké?

³⁶ Yen mèn nà bùnte ntshob ndù: Tshùaben, a b'a we, ndù me bam i à?

³⁷ Yésu tshob yi ndù: O yen i, mèn ze bin yi tshwèt ntshobte là, a b'a be kua' yi.

³⁸ A tshob ndù: Tshùaben, me bam. A vù nsi kabkab mbwe i, ngamt'é.

³⁹ Yésu tshob ndù: Me se' ntùm yen njù li à num netsho'te ntsha, ndù ben tse bo ke tshwèt njen nà yene; ben tse bo tshwèt njen nà tù' mfùmiag.

⁴⁰ Tsemo' ba Férésia tse bo à bo be là be ju' men ntshob là, ntshob yi ndù: Mba bag yag b'a ba mfùmiag ké?

⁴¹ Yésu tshob bo ndù: A lo mbe ndù bin b'a ba mfùmiag mba bin ke' ghù nukebwô num bin; là ndonni bin tshwèt ntshob ndù: Bag tshwèt njene. Nukebwô zin ghô num bin.