Yohané 7 - NTSHOB NSI

Mba Yésu nèn Yérusalém nà

¹ Tshen nà lo be tshùa, Yésu nke nzinte ntùm ngô Galiléa, là, a lo ke kô nezinte ntùm ngô Yudéa, nummbe ba Yuda lo ke ndiag nezwi i.

² Lé'njù jùa ba Yuda, lé'njù ntàb lo ghebte.

³ Ndùlala fèt tse tshob yi ndù: Lo nsen ni nèn Yudéa ndù mba ghazi'te nu o yen yub mfa' mu mi o tshwèt mfa' là.

⁴ Nummbe mèn z'a diag ndù bo lèn i là ke' be ghù sàm ju ntùm tsham: Mb'o be ngù tshen tshu li là, tswite wul o njù.

⁵ Nummbe mba fèt tse lo ke be bam i.

⁶ Là Yésu tshob bo ndù: Mba me là, yàm ngelaṅ ke' yoṅ nse'e, mba bin nà, zin ngelaṅ ke mb'a be neku' njoṅ ndù fa.

⁷ Njù ke' ku' nebàn zine, là, a tshwèt mbàn àm, nummbe me tshwèt nkwé nta num i ntshob ndù mfa' mi b'a mi kebwô.

⁸ Bin, bin ko' nèn mum lé'njù jùa; tu wul àm, me ke tshwèt njoṅ nko' nèn mum sen lé'njù jùa là, nummbe yàm ngelaṅ ke' yoṅ mbumte.

⁹ A tshob tshen nu là bo, ntswe Galiléa.

¹⁰ Là ngelaṅ fèt tse ko' nèn lé'njù jùa là, mba yi ko' nèn bwe, ke ko' à ndaṅndaṅ, là ntùm nelemte.

¹¹ Ndùlala ba Yuda nke ndiag i dù' lé'njù jùa ntshob ndù: A b'a yà?

¹² Ntshobte tun ntô yàm be netèt bwoṅ benntùn num nu i. Tsemo' ben nke ntshob ndù: A b'a mèn mebwô; tsemo' bèn nke ntshob ndù: Nga, a tshwèt nke ngù benntùn mfàn manze.

¹³ Là sàm mèn lo ke be tshob nu num i ndaṅndaṅ, nummbe bo lo ke mbwôg ba Yuda.

Mba Yésu tswite ntùm ndà Nsi là

¹⁴ Là mba bo na' ntù' b'a netèt lé'njù jùa là, Yésu ko' nèn ndà Nsi nke ntswite.

¹⁵ Ndùlala ba Yuda nke ntshàm ntshob ndù: A ghù à ndùke, kà yen mèn ni ndèn ṅwa'ni Nsi ke be ndù a zi't'à?

¹⁶ Là Yésu bùnte bo ntshob ndù: Yàm netswite ke b'a yàm, là ze mèn z'a tum àm nà.

¹⁷ A be ze mèn kô neghù ze nekô Nsi là mb'a nsi lène, a be ze yen netswite li fe à Nsi là, ke ndù me ke ntshob à num tu wul àm lo.

¹⁸ Mèn z'a ke ntshob nu à num tu wul i là ke ndiag à ze ghamte, là mèn z'a ke ndiag ghamte mèn z'a tum i là, yen mèn nà b'a mèn nenùne, ndù nuketsin ke' be ntùm ntù i.

¹⁹ A ke b'a Mosé na' mfà ntshù' bin ké? Sàm mèn netèt bin ke' be ze ntshù'. Bin ke ndiag nezwi àm numke?

²⁰ Bwoṅ benntùn bùnte ndù: O ghù ywètkebwô! We z'a tshwèt ndiag nezwi o à?

²¹ Yésu bùnte ntshob bo ndù: Me lo fa' fa' ntshù' njoṅ zin fa tshàm.

²² A ndùlala Mosé lo fà nesi ket bon bin, ke b'a ndù a fe à Mosé, là a fe à ba tà, a num mbe lé'njù Sabbat bin nke nsi ket mènntùn.

²³ A be ze bo num nsi ket mènntùn lé'njù Sabbat ndù kà bo bagte ntshù' Mosé là, kà numke bin nke nja ntù me mba me na' njate njoṅ wut mèn fa lé'njù Sabbat l'à?

²⁴ Kà bin tsho'te ntsha mèn num miag, là bin tsho'te ntsha z'a tsin nà.

²⁵ Là tsemo' ba Yérusalém lo ke ntshob ndù: A ke mèn ze bo ke ndiag nezwi i li ké?

²⁶ Tshù, a tshwèt ntshob nu be ndaṅndaṅ, bo ke tshob sàm nu yi! Mo' ndù ghakwé mbwe ntùm ngô lèn kua' nenùn ndù a b'a Kristô.

²⁷ Là yen mèn ni bag lèn dù' z'a be mèn bwe là. Mbe se' mba Kristô là, ngelaṅ z'a nsi se' là, sàm mèn ke nsi lèn dù' z'a be mèn bwe là.

²⁸ Là Yésu kua' nze neta, nke ntswite ntùm sinagogue ntshob ndù: Ṅ, bin lèn dù' ze me be mèn bwe là. Me ke se' à num yàm tu wut, là mèn z'a tum àm nà b'a nenùne, ze bin ke' lèn i là.

²⁹ Tu wul àm, me lèn i, nummbe me fe à yi, a b'a yi bèn ntum àm.

³⁰ Ndùlala bo nke ndiag netshùb i, là sàm mèn ke yab bu num i, nummbe ze ngelaṅ lo ke yoṅ nku'u.

³¹ Là netèt bwoṅ benntùn ben yàm lo bam i; nke ntshob ndù: Ngelaṅ Kristô nsi se' là a' ghù nsà ntshùa mba yen mèn ni ghù là ké?

³² Ba Férésia ju' mba bwoṅ benntùn tshwèt ntshob men ntshob li num Yésu tun tô bo là; ghale'te Nsi tse ndùbndùb mba ba Férésia tum ghafa' ndù bo nèn ntshùb i.

³³ Ndùlala Yésu tshob ndù: Bag à bin bèn be num mo' mén ngelaṅ, me nèn ntèt mèn z'a tum àm nà.

³⁴ Bin nsi diag àm ke fon àm; dù' ze be me nèn bwe là bin ke' ku'ni nese' bwe.

³⁵ Ndùlala ba Yuda tshob bo bo ndù: A nsi nèn à yà kà be be ke fon i à? Mo' ndù a nsi nèn mbaṅ ben tse bo sate nèn netèt ba Grikia tswite ba Grikia.

³⁶ Men tshob li mi a tshob ndù: Bin nsi diag àm ke fon àm, dù' ze me nèn bwe bin ke' ku'ni nese' bwe là, men ntshob li bagt'a ndùke?

³⁷ Lé'njù jùa se ndùb mànjam num tshen lé'njù là, Yésu tsin tù nkua' nze neta ntshob ndù: A be ze ntù mèn kù là, a se' me, nu.

³⁸ Mèn z'a bam àm nà mba nta'ntse mi neyôg nsi tum ntùm ntù i mba ṅwa'ni Nsi na' ntshob là.

³⁹ A ke ntshob yen ni mfà à num Ywèt tse ben bo bam i nsi kwé là; nummbe Ywèt lo ke yoṅ mbe, nummbe Yésu lo ke yoṅ ntsho ntùm nkuni mi.

⁴⁰ Ndùlala tsemo' ben netèt bwoṅ benntùn be ju' men ntshob li, nke ntshob ndù: Yen mèn ni b'a kua' ngatshob ntshob Nsi.

⁴¹ Tsemo' bèn nke ntshob ndù: Yen mèn ni b'a Kristô. Là tsemo' bèn nke ntshob ndù: Kristô nsi be se' fe à Galiléa ké?

⁴² Ṅwa'ni Nsi lo ke tshob ndù Kristô nsi fe à ntùm nzwit David, ntùm Bétléhém, taṅla' ze David be mèn bwe là ké?

⁴³ Ndùlala fagte vù netèt bwoṅ benntùn num i.

⁴⁴ Tsemo' ben netèt bo nke nkô netshùb i, là sàm mèn ke yab mbu num i.

⁴⁵ Ndùlala ghafa' bèn njam mbaṅ ghale'te Nsi tse ndùbndùb mba ba Férésia. Tshen ben ni tshob bo ndù: Numke bin ke lo' i nse' yi à?

⁴⁶ Ghafa' bùnte ndù: Mèn ke' yoṅ nto' tshob nu ndaṅndaṅ mba yen mèn ni tshwèt ntshob là.

⁴⁷ Ndùlala ba Férésia bùnte bo ndù: Mba bin zin faṅ a ghù bin fàn manze ké?

⁴⁸ Mo' mèn netèt ghakwé mbwe ntùm ngô, ke ba Férésia lo bam i ké?

⁴⁹ Là yen bwoṅ benntùn nà tse bo ke' lèn ntshù' là b'a ghandon.

⁵⁰ Nikôdémo, mo' mèn netèt bo, z'a na' nèn mbaṅ Yésu mo' tèttswe' là tshob bo ndù:

⁵¹ Ntshù' be be naṅ ntsha tu mèn ke be ndù be bwôgmbwe ntsho't'é, nju'u, mbèn ndèn ju z'a ghù là ké?

⁵² Bo bùnte yi ndù: Mba wù b'a ze Galiléa kà? Siaṅ ṅwa'ni njen ndù ngatshob ntshob Nsi ke' be tum Galiléa. [

⁵³ Mba we lo nèn la' i.