Yohané 6 - NTSHOB NSI

Mba Yésu kém benntùn ntsha' tàn bàn nà

¹ Tshen nà lo be tshùa, Yésu nèn mo' yoṅ dibantse Galiléa ke Tibériade lo.

² Là mo' bwoṅ benntùn yàm tam njam i, nummbe bo lo ke njen nsà ts'a ke ngù num ghangokèt là.

³ Là Yésu ko' num mbale, ntswe nsi bwe, boa ghazi'te nu i.

⁴ Là Pasa lé'njù jùa ba Yuda lo ghebte.

⁵ Yésu bù' miag mi, mbe yen ndù mo' bwoṅ benntùn yàm tshwèt nse' mbaṅ i, ntshob Filibo ndù: Be nsi jun bàn à yà kà tshen ben ni jù à?

⁶ Là, a tshob ndùlal'a num nelo' ndaṅt'é yi, nummbe tu wul i lèn ju z'a nsi ghù là.

⁷ Filibo bùnte yi ndù: Be jun bàn denario nkù bàa mb'a ke ku' njoṅ z'a be mba we lo kwé meju i là.

⁸ Mo' mèn netèt ghazi'te nu i, Andréa mfèt Simon Pétro tshob yi ndù:

⁹ Mo' ménnshum num nsen ni z'a ghù ntu' bàn ntàn mba ndô ngontse bàa là, là, a ku' ke num yen njoṅ benntùn ni à?

¹⁰ Yésu tshob ndù: Bin ghù benntùn tswe nsi. Là nenà lo be ntùm yen dù' là yàme. Bandum tse bo tswe nsi là be nguan benntùn ntsha' tàn.

¹¹ Ndùlala Yésu lo' bàn, nde'te Nsi, ngabte ben tse bo tswe nsi là, mbèn ngù be ndaṅndaṅ mba num ngontse mba bo ke nkô là.

¹² Ngelaṅ bo ywèt là, a tshob ghazi'te nu i ndù: Bin tse'te mbe'te mi mi a tù' là ndù kà lèn kam i bi.

¹³ Ndùlala, bo tse'te mbe'te bàn mi a tù' num bàn tàn tse bo jù là, a dun nkag ntshob bàa gham.

¹⁴ Benntùn yen nsà z'a ghù là, ntshob ndù: Yen mèn ni b'a kua' ngatshob ntshob Nsi z'a se' ntùm njù là.

¹⁵ Là Yésu lèn ndù bo nsi se' tshùb i, ghom i mfen; a tum mbèn nèn num mbat tù' i.

Mba Yésu zin num ntse là

¹⁶ A be be mfetnjù, ghazi'te nu i swe' nèn mà dibantse,

¹⁷ ntsho ntùm kenu nèn mo' yoṅ dibantse, nze Kapernaum. A lo be be ndù njam à sène. Yésu ke yoṅ nse' mbaṅ bo.

¹⁸ Fetmbaṅ ndùb nke ntshu'u, dibantse nke mbùnte.

¹⁹ Ngelaṅ bo zin nguan mfi' ntshob tàn ṅam mbàa ke ṅam ntat lo là, bo yen Yésu, a nke nzin num ntse nke ngebte mbaṅ kenu, bo bwôg.

²⁰ Là, a tshob bo ndù: A b'a me, kà bin bwôg.

²¹ Ndùlala bo nke nkô nelo' i ntùm kenu; là be ndùse kenu kum kaṅ ntse dù' ze bo ke nèn nà.

Bàn yôg

²² Njù be làne, bwoṅ benntùn tse bo tù' yoṅ dibantse là yen ndù mo' kenu lo ke be bwe k'a ke nda' se ntshù', mba ndù Yésu lo ke tsho ntùm kenu boa ghazi'te, là ndù ghazi'te nu i lo nèn à tù' bo.

²³ Là memo' nkenu fe Tibériade nse' mbaṅ dù' ze bo jù bàn bwe, ngelaṅ Tshùaben lo' bàn, nde'te Nsi là.

²⁴ Ngelaṅ bwoṅ benntùn yen ndù Yésu ke ghazi'te nu i lo ke' bèn mbe yen dù' là là, mba bo tsho yub ntùm nkenu, nèn Kapernaum diag Yésu.

²⁵ Bo be fon i mo' yoṅ dibantse ntshob yi ndù: Rabbi, o se' nsen ni à zit ngelaṅ à?

²⁶ Yésu bùnte bo ntshob ndù: Bin ke ndiag àm ke b'a mba bin lo njen nsà là, là nummbe bin lo njù mbàn njwèle.

²⁷ Bin fa'a, ke b'a num jujù z'a num mbi là, là num jujù z'a be ntswe num yôg matmat, ze Mén mèn nsi fà bin nà; nummbe a b'a yi ze Tà, Nsi te sitam i num i là.

²⁸ Ndùlala bo tshob yi ndù: Bag nsi ghù à ke ndù bag fa' mfa' Nsi à? Yésu bùnte ntshob bo ndù:

²⁹ Fa' Nsi b'a sen ni ndù bin bam mèn z'a tum nà.

³⁰ Ndùlala bo tshob yi ndù: A zit nsà z'o ghù ndù bag yen mbam o à? A sit fa' s'o fa' à?

³¹ Ba tà tshag lo jù mànà num kônkwa, ndaṅndaṅ mba bo kite là ndù: A fà bàn z'a fe kamànyam nà bo, bo jù.

³² Ndùlala Yésu tshob bo ndù: Kua' nenùne, kua' nenùne, me tshob bin ndù: A ke' b'a Mosé na' mbèn mfà bàn z'a b'a ze nenùn nà.

³³ Nummbe bàn Nsi b'a z'a fe kamànyam, z'a fà yôg njù là.

³⁴ Ndùlala bo tshob yi ndù: Tshùaben, ke mfà be lèn yen bàn nà bag njoṅ ngelaṅ fa.

³⁵ Yésu tshob bo ndù: Tu wul àm, me b'a bàn yôg. Mèn z'a se' me là mba nziku' ke bèn ney'é, mèn z'a bam àm nà, mba ntù i ke bèn nekù.

³⁶ Là me lo tshob bin ndù bin yen àm ke bam.

³⁷ Njoṅ i fa ze Tà num mfà me là nsi se' me; mèn z'a se' me là, mba me ke nsi ma' i njù.

³⁸ Nummbe me swe' mfe kamànyam, nse'e, ke b'a neghù à yàm nekô, là nekô mèn z'a tum àm nà.

³⁹ Là nekô mèn z'a tum nà b'a yen ni ndù kà me ghù sàm ju bi num njoṅ i fa z'a fà me là; là ndù me se' mbam i num vù ntùm miagte lé'njù.

⁴⁰ Nummbe nekô Tàa b'a yen ni ndù mba we lo z'a yen Mén i mbam i là ghù yôg matmat, mba ndù me se' mbam i num vù ntùm miagte lé'njù.

⁴¹ Ndùlala ba Yuda tshobte tun ntô num i, nummbe a lo tshob ndù: Tu wul àm, me b'a bàn z'a swe' mfe kamànyam nà.

⁴² Bo nke ntshob ndù: Yen ni ke b'a Yésu mén Yosèf, ze be lèn tàab mba màab là ké? K'a ke ntshob ndonni ndù: Me swe' à mfe kamànyam à ndùke?

⁴³ Yésu bùnte ntshob bo ndù: Kà bin tshobte tun ntô netèt bin.

⁴⁴ Sàm mèn ke' ku'ni nese' me, a be ze Tà z'a tum àm nà ke' soṅt'é là; mba tu wul àm nsi se' bam i num vù ntùm miagte lé'njù.

⁴⁵ Bo lo kite ntùm ṅwa'ni ghatshob ntshob Nsi ndù: Nsi nsi tswite njoṅ yub fa. Mba we lo z'a ju' nu Tà nzi'te là num nse' me.

⁴⁶ Ke b'a ndù mèn to' yen Tà k'a ke nda' mèn z'a fe mbaṅ Nsi là, a yi z'a yen Tà là.

⁴⁷ Kua' nenùne, kua' nenùne, me tshob bin ndù: Mèn z'a bam nà ghù yôg matmat.

⁴⁸ Tu wul àm b'a bàn yôg.

⁴⁹ Ba tà tsin lo jù mànà num kônkwa mbèn nkwù.

⁵⁰ Yen ni b'a bàn z'a swe' mfe kamànyam nà, ndù mèn jù i ke bèn nekwù là.

⁵¹ Tu wul àm b'a bàn z'a yôge, z'a swe' mfe kamànyam nà; a be ze mèn jù yen bàn ni là, mb'a' yôg matmat. Bàn ze me nsi fà là b'a mbàb wul àm num yôg njù.

⁵² Là ba Yuda nke nta ntshu netèt bo ntshob ndù: Yen mèn ni ku'ni nefà mbàb wul i be be fèl à ndùke?

⁵³ Ndùlala Yésu tshob bo ndù: A be ze bin ke' fèt mbàb wut Mén mèn ke bèn nu lem tse là, mba bin ke ghù yôg num bin.

⁵⁴ Mèn z'a fèt mbàb wul àm mbèn nu lem tshàm nà ghù yôg matmat, tu wul àm nsi se' bam i num vù ntùm miagte lé'njù.

⁵⁵ Nummbe mbàb wul àm b'a kua' ju nejù, lem tshàm bèn mbe kua' ju nenu.

⁵⁶ Mèn z'a fèt mbàb wul àm, mbèn nu lem tshàm nà ghô num àm, mba me yàm ghô num i.

⁵⁷ Mba Tà z'a yôg tum àm, me nke ntshùa njam i njôg là, be ndaṅndaṅ, mèn z'a fèl àm nà nsi tshùa njam àm yôge.

⁵⁸ Yen ni b'a bàn z'a swe' mfe kamànyam nà. A ke b'a lèn ze ba tà tsin na' njù mbèn nkwù là. Mèn z'a jù yen bàn ni là mb'a' yôg matmat.

⁵⁹ A tshob tshen nu li ngelaṅ a ke ntswite ntùm sinagogue mà Kapernaum nà.

⁶⁰ Ghazi'te nu i yàm be ju' ndùlala, ntshob ndù: Men ntshob li lèle, we z'a ku'ni neju' à?

⁶¹ Là Yésu be lèn ntùm ntù i ndù ghazi'te nu i tshwèt ntshobte tun ntô num yen nu là, ntshob bo ndù: Yen nu li fa'te zin ké?

⁶² Kà bin yen Mén mèn ko' nèn dù' z'a be bwe mbwe l'o?

⁶³ Ywèt bèn nke mfà yôg, mbàb wut ke' be ywimte sàm ju. Ntshob mi me lo ntshob bin nà b'a Ywèle, mba yôg.

⁶⁴ Là tsemo' ben num netèt bin tse bo ke tshwèt mbam nà. (Nummbe fe neto'te Yésu lo lèn ben tse bo ke mbe ke bam nà, mba mèn z'a nsi swèn i là).

⁶⁵ A nke ntshob ndù: A num ndùlala me lo tshob bin ndù sàm mèn ke' ku'ni nese' me, a be ze Tà ke' fà yi là.

Pétro bam ndù Yésu b'a Kristô

⁶⁶ Fe num yen ngelaṅ nà, ghazi'te nu i yàm lo njam i, ke bèn nezin bo à bo.

⁶⁷ Ndùlala Yésu tshob tse ntshob bàa gham ndù: Mba bin zin, bin ke' kô nenèn ké?

⁶⁸ Simon Pétro bùnte yi ndù: Tshùaben, bag nèn tèl à we? O ghù ntshob yôg matmat;

⁶⁹ bag lo bame, bag lo lèn ndù o b'a mèn nelàn z'a fe Nsi là.

⁷⁰ Yésu bùnte bo ndù: A ke b'a me na' mbèn ntsho' zin bin tse ntshob bàa gham ké? Là mo' mèn netèt bin b'a ywètkebwô.

⁷¹ Là, a ke ntshob à Yuda mén Simon ze Iskariot. Nummbe a b'a yi, mo' mèn netèt tse ntshob bàa gham, z'a nsi swèn i là.