Yohané 5 - NTSHOB NSI

Neyate kekat ntùm Bètèsda

¹ Tshen nà lo be tshùa, mo' lé'njù jùa ba Yuda be; Yésu ko' nèn Yérusalém.

² Mbaṅ nzendà njùmbwe mà Yérusalém, mo' dù' lo be bwe, ndù bo kut ba' bwe, ze bo ke ntsiaṅ num ntshob Héber ndù Bètèsda là; a lo ghù bam ntshundà tàn.

³ Ntùm tshen nzendà là, ghangokèt yàm lo nôte bwe, ba mfùmiag, ba nke'kèt, ba kekale, [nke mbéb ngelaṅ ntse kamte là.

⁴ Nummbe Angél Tshùaben lo ke nswe' ntùm yen dù' ntse là tsemo' ngelaṅ, nyi't'é. Mbwe mèn z'a swe' nèn ngelaṅ a nyi'te ntse là mb'a yate num nge' i, a be z'a b'a mba zit ngokèt lo là.]

⁵ Mo' mèn lo be bwe ndù a tswe ngu'njù ntshob fom ṅam ntat mb'a tshwèt ngon nà.

⁶ Yésu be yen i mb'a nô nsi là, ndèn ndù a tswe neshu mb'a tshwèt ngon nà; ntshob yi ndù: O kô neyate ké?

⁷ Ngangokèt bùnte yi ndù: Tshùaben me ke' ghù mèn z'a be a ma' àm ntùm dù' ntse ngelaṅ Angél nyi'te ntse là; a num mbe ngelaṅ ze me tshwèt nèn bwe là, mo' mèn bwôg swe' ntsho bwe me.

⁸ Yésu tshob yi ndù: Lo tù, nket nke'kun o, nzine.

⁹ Be ndùse, mèn nà yate, nket nke'kun i, nzine. Là sen lé'njù là na' mb'a lé'njù Sabbat.

¹⁰ Ndùlala ba Yuda nke ntshob mèn z'a yate là ndù: A b'a lé'njù Sabbat, ntshù' ke' bam ndù o ket kun so nèn yi.

¹¹ Là, a bùnte bo ndù: Mèn z'a yat'àm nà, a yi bèn ntshob me ndù: Ket kun so nzine.

¹² Bo bètt'é ndù: A zit mèn z'a tshob wù ndù: Ket kun so nzin à?

¹³ Mèn z'a yate là lo ke lèn yen mèn nà, nummbe Yésu lo bi netèt benntùn, mo' bwoṅ benntùn lo be num yen dù' là.

¹⁴ Tshen nà lo be tshùa, Yésu tèl i ntùm ndà Nsi ntshob yi ndù: Tshù o là z'o yate là, kà bèn neghù nukebwô, mbwôg ndù kà nu z'a bag ntshùate là tsho num o.

¹⁵ Yen mèn nà nèn nsoṅ ba Yuda ndù a b'a Yésu na' mbèn ngù k'a njate.

¹⁶ A tshùa ndùlala ba Yuda tsho' nku Yésu kebàn, nummbe a lo ke ngù tshen tshu là lé'njù Sabbat.

¹⁷ Là Yésu bùnte bo ndù: Tà tshwèt mfa'a, tà nse' nkum ndonni, mba tu wul àm tshwèt mbèn mfa' yàm.

¹⁸ A tshùa num ndùlala ba Yuda bèn nke ndiag nezwi i, ke b'a nda' mb'a ke mbagte lé'njù Sabbat là, là num mb'a ke mbèn ntshob ndù Nsi b'a kua' Tàab, nke ndo' wul i ndaṅndaṅ mba Nsi là.

Fa' Mén Nsi

¹⁹ Ndùlala Yésu bùnte nke ntshob bo ndù: Kua' nenùne, kua' nenùne, me tshob bin ndù: Mén ke' ku'ni neghù sàm ju ze tu, k'a ke be ndù a yen Tà nke ngù. Nummbe tshu tse Tà num ngù là, mba Mén be mbèn ngù ze be ndaṅndaṅ.

²⁰ Nummbe Tà num nkô Mén, a la'te njoṅ tshu fa ts'a num ngù là yi, a nsi bèn la'te mfa' ndùbndùb mi a tshùa men ni là yi, ndùlala ndù bin tshàme.

²¹ Nummbe mba Tà be mbam fe ben, ngù bo yôg là, be ndaṅndaṅ Mén ze be ngù ben ts'a kô là yôg.

²² Nummbe Tà ke' be tsho'te mèn, là, a fà njoṅ netsho'te ntsha fa Mén,

²³ ndùlala ndù njoṅ benntùn fa ghamte Mén mba bo be ngamte Tà là: Mèn z'a ke' be ghamte Mén nà, ke' be ghamte Tà z'a tum i là.

²⁴ Kua' nenùne, kua' nenùne, me tshob bin ndù: Mèn z'a num nju' ntshob màm mbam mèn z'a tum àm nà ghù yôg matmat; mbe ndù a ke bèn nese' mbwe netsho'te ntsha, là, a tum ntùm vù nèn ntùm yôg.

²⁵ Kua' nenùne, kua' nenùne, me tshob bin ndù ngelaṅ bwe nku'u, ndù à ku' ndonni, ze fe ben nsi ju' nze Mén Nsi, ze ben tse bo ju' nz'é nsi yôg là.

²⁶ Nummbe mba Tà ghù yôg num tu wul i là, be ndaṅndaṅ a fà mba Mén ndù a ghù yôg num tu wul i.

²⁷ A bèn mfà mba ngù' netsho'te ntsha yi, nummbe a b'a Mén mèn.

²⁸ Kà bin tshàm num yen nu là, nummbe ngelaṅ ku'u, ze njoṅ fe ben fa tse bo be ntùm mfi là nsi ju' nz'é tume:

²⁹ Ben tse bo ghù numebwô là nsi lo num vù num yôg, ben tse bo ghù nukebwô là nsi lo num vù num netsho'te ntsha.

³⁰ Me ke' ku'ni neghù sàm ju yàm tu; ndaṅndaṅ mba me ju' là, me num ntsho'te, yàm netsho'te ntsha b'a netsine, nummbe me ke ke ndiag à yàm nekô, là nekô mèn z'a tum àm nà.

³¹ A be ze me bèn nke nkwé nta wul màm nà, mba yàm nekwénta ke' b'a nenùne.

³² Mo' mèn num bwe z'a tshwèt nkwé nta màm nà, me lèn ndù kwénta z'a tshwèt nkwé num àm nà b'a nenùne.

³³ Bin lo tum benntùn mbaṅ Yohané: A kwé nta nu nenùne.

³⁴ Mba me là, yàm kwénta ke' fe à mènntùn, là me tshob yen nu l'a ndù bin yôge.

³⁵ Yen mèn nà na' mb'a lambo s'a ke nkù, mbèn nke nké' là; là bin, bin lo kô netsiaṅte num nka' i num metsit ngelaṅ.

³⁶ Là tu wul àm me ghù kwénta z'a be ze ndùb ntshùa ze Yohané là; nummbe mfa' mi Tà fà me ndù me miagte là, men mfa' là mi me tshwèt mfa' là tshwèt nkwé nta màm ndù Tà tum àm.

³⁷ Tà z'a tum àm nà, tu wul i lo kwé nta màm. Bin ke' to' ju' nz'é ke bèn njen se i;

³⁸ ntshob mi ke' ghô num bin, nummbe bin ke' bam mèn z'a tum nà.

³⁹ Bin num nke ntswe' ntun ṅwa'ni Nsi, nummbe bin be nkwate ndù bin a' ghù yôg matmat là num i, a yi bèn nke nkwé nta màm.

⁴⁰ Là bin ke' kô nese' me ndù bin ghù yôg.

⁴¹ Yàm ghamte ke' fe à benntùn.

⁴² Là me lo lèn zine; bin ke' ghù nkôni Nsi ntùm ntù tsine.

⁴³ Tu wul àm me se' à num lén Tà, là bin ke lo' àm. A be ze mèn se' num ko' se lén nà, mba bin nsi lo' yen mèn nà.

⁴⁴ Be bin ku'ni nebam à ndùke, bin tse zin ghamte ke fe à bin bin, bin ke bèn nediag ghamte z'a fe nda' Nsi tù' i l'à?

⁴⁵ Kà bin kwate ndù me nsi ghù bote zin mbwe Tà; mèn z'a tshwèt mbote zin nà b'a Mosé ze bin num nywinte là.

⁴⁶ Nummbe, a be bin bam Mosé là, mba bin nsi bam mba me yàm; nummbe a lo kite nu num àm.

⁴⁷ Là, a be ze bin ke' bam tshu ts'a na' nkite là, mba bin nsi bam ntshob màm à ndùke?