Yohané 19 - NTSHOB NSI

Mba Pilato fà Yésu mbu ba Yuda là

¹ Yen nà be tshùa, Pilato ghù bo lo' Yésu, ndab i nshua'a.

² Ba *gi*soyé te tshe' se bo lo' njô mba' yi là tu i, ma' nzwe meba num i,

³ nse' mbaṅ i, ntshob ndù: Bag tsha't'o me mfen ba Yuda! Bo lab ntoṅ mi.

⁴ Pilato bèn ntum njù ntshob bo ndù: Tshù, me lo' i ntum yi njù, ndù bin lèn ndù me ke' fon sàm nu z'a ku'ni neghù a vù ntsha là.

⁵ Ndùlala, Yésu tum njù tshe' njô mba nzwe meba be num i. Pilato tshob bo ndù: Tshù mèn nà!

⁶ Ngelaṅ ghale'te Nsi tse ndùbndùb mba ghafa' yen i là, bo kua' ntshob ndù: Kwimt'é num fanta'tù! Kwimt'é num fanta'tù! Pilato tshob ndù: Bin lo' i nkwimt'é num fanta'tù zin tu. Nummbe tu wul àm, me ke' fon sàm nu z'a ku'ni neghù a vù ntsha là.

⁷ Ba Yuda bùnte yi ndù: Bag ghù ntshù' yag, a tshùa num yen ntshù' là, a' kwù, nummbe a lo' wul i ngù Mén Nsi yi.

⁸ Ndùlala ngelaṅ Pilato ju' men ntshob li là, a bèn mbwôg ntshùate,

⁹ mbèn mbèn ntshundà ngomna, ntshob Yésu ndù: O fe à yà? Là Yésu ke fà sàm mbùnte ntshob yi.

¹⁰ Ndùlala Pilato tshob yi ndù: O ke' tshob nu me ké?

¹¹ Yésu bùnte ndù: A lo mbe ndù Tà mfe kamànyam ke' fà wù, mb'o ke' ghù sàm ngù' num àm. A ndùlala mèn z'a fà àm wù là ghù nukebwô z'a be ze ndùb ntshùate là.

¹² Ndùlala Pilato nke ndiag nekag i. Là ba Yuda kua' ntshob ndù: A be z'o kag yen mèn ni là mb'o ke b'a nshun Kàsà! Mba we lo z'a lo' wul i ngù mfen yi là mb'a tshabte Kàsà.

¹³ Ndùlala Pilato be ju' men ntshob li, ndo' Yésu ntum yi njù, ntswe num diaṅ ntsha dù' ze bo ke ntsiaṅ nsindà ndoṅ, num ntshob Héber ndù Gabata là.

¹⁴ A na' mb'a lé'njù nenabte Pasa, a na' mb'a nguan njagnyam. A tshob ba Yuda ndù: Tshù mfen zin nà.

¹⁵ Bo kua' ndù: Bènte yi! Kwimt'é num fanta'tù! Pilato tshob bo ndù: Me nsi kwimte mfen zin num fanta'tù ké? Ghale'te Nsi tse ndùbndùb bùnte ndù: Bag ke' ghù mo' mfen, mb'a nda' Kàsà.

Mba bo kwimte Yésu num fanta'tù là

¹⁶ Ndùlala a fà i bo ndù bo kwimt'é num fanta'tù, ndùlala bo lo' Yésu.

¹⁷ A ket ze fanta'tù ze tu, ntum nèn dù' bo ke ntsiaṅ nkatu, z'a be num ntshob Héber ndù: Gôlgota là.

¹⁸ Bo kwimt'é bwe num fanta'tù boa tsemo' ben bàa, Yésu be netèt.

¹⁹ Pilato lo kite mba mo' kam ṅwa'ni, njab num fanta'tù. Bo lo kite bwe ndù: Yésu ze Nazarèt, mfen ba Yuda.

²⁰ Ba Yuda yàm siaṅ yen kam ṅwa'ni là, nummbe dù' ze bo kwimte Yésu bwe num fanta'tù là lo b'a mbaṅ ngô. Bo lo kit'a num ntshob Héber, ntshob Roma, mba ntshob Grikia.

²¹ Ndùlala ghale'te Nsi mba ba Yuda tse ndùbndùb nke ntshob Pilato ndù: Kà kite ndù: Mfen ba Yuda, là ndù: Yen mèn ni lo tshob ndù: Me b'a mfen ba Yuda.

²² Pilato bùnte ndù: Ju ze m'a kite là, m'a kite.

²³ Ndùlala ngelaṅ ba soyé kwimte Yésu num fanta'tù là, bo lo' nzwe tse ngabte nze kuà, ta' nze num ta' soyé, bo lo' mba kum se, là sen kum nà lo ke ghù dù' netam num bwe, bo na' mba' i neba' fe tù nkum nsi.

²⁴ Ndùlala bo tshob bo bo ndù: Kà be fagt'é, là be tam tô, mèn a jù là. Ndùlala ndù ṅwa'ni Nsi bumte ndù: Bo ghabte nzwe tshàm bo bo, ndo' kum sàm ntam tô yi. A b'a ju ze ba soyé ghù là.

²⁵ Màab mba ngon màab, Maria nzwi Kléopas, mba Maria ze Magdala lo tsin mbaṅ fanta'tù Yésu.

²⁶ Ndùlala Yésu be yen màab mba ngazi'te nu i, yen nà z'a ke nkô i tsin bwe là, ntshob màab ndù: Mènnzwi, tshù mén o là.

²⁷ A bèn ntshob ngazi'te nu i ndù: Tshù màan nà. Fe num yen ngelaṅ nà, ngazi'te nu i lo' i la' i.

²⁸ Yen nà lo be tshùa, Yésu z'a lèn ndù njoṅ nu fa à bumte là tshob ndù: Ntù àm kù, ndùlala ndù ṅwa'ni Nsi bumte.

²⁹ Mo' kab lo be bwe ndù tshùagkèt ndu' dun bwe. Bo lo' ntsha nzwe, nyu' ntùm tshùagkèt ndu', mfét tu nzenyi, ntshag tù, nèn yi ntshu i.

³⁰ Ngelaṅ Yésu kwé tshùagkèt ndu' là, a tshob ndù: A bumte, mben wul i nsi, nkwù.

³¹ Ndùlala, mb'a na' mb'a lé'njù nenabte là, ba Yuda bètte Pilato ndù a ghù bo be be'te nku ben tse bo kwimte yub num fanta'tù là, mbèn nswe' bo num fanta'tù ndùlala ndù kà fe tshob ghô num fanta'tù ngelaṅ Sabbat, nummbe lé'njù yen Sabbat là na' mb'a se ndùb.

³² Ndùlala ba soyé se' mbe'te nku mbwe i, mba mbatt'é, ben tse bo kwimte yub bo à bo là.

³³ Là bo be kum num Yésu njen ndù à kwù, bo ke be'te nku mi,

³⁴ là mo' mèn netèt ba soyé to nsa Yésu kô; be ndùse lem mba ntse tum.

³⁵ Mèn z'a na' njen nà kwé nta, kwénta i b'a nenùne, yen mèn nà lèn ndù a tshob à nenùne, ndùlala ndù mba bin zin bame.

³⁶ Nummbe tshen tshu là se' à ndù ṅwa'ni Nsi bumte ndù: Bo ke nsi be'te sàm vôg se.

³⁷ Ṅwa'ni Nsi bèn ntshob mo' dù' ndù: Bo nsi lôte mèn ze bo sob i là.

Mba bo tshoṅ Yésu là

³⁸ Tshen nà lo be tshùa, Yosèf ze Arimatia z'a na' mbe ngazi'te nu Yésu, là ntùm tsham, nummbe a lo ke mbwôg ba Yuda là, bètte Pilato neswe' fe Yésu. Pilato bam, ndùlala a se' nswe' fe i.

³⁹ Mba Nikôdémo z'a na' nèn mbaṅ Yésu mo' tèttswe' là, se' ndù a ghù labinda mire bo tamte aloé là, z'a lèt bwoṅ nkù là.

⁴⁰ Ndùlala bo swe' fe Yésu num fanta'tù, ndam i nzwe boa labinda, mb'a be mat ba Yuda netshoṅ fe mèn nà.

⁴¹ Là dù' ze bo kwimte Yésu bwe là, mo' nà lo be bwe, ntùm yen nà là, mo' fi nswe lo be bwe, ndù bo ke' yoṅ njab fe mèn ntùm bwe.

⁴² Mb'a na' mb'a lé'njù nenabte ba Yuda là, bo yab Yésu bwe, nummbe fi lo ghebte.