Yohané 16 - NTSHOB NSI

Ngafitentù

¹ Me lo tshob tshen tshu li bin, ndùlala ndù kà bin vù ntùm ywi'.

² Bo nsi sô zin ntùm ba sinagogue; mba ngelaṅ tshwèt nku'u, ze mba we lo z'a nsi zwi zin nsi kwate ndù a fa' Nsi là.

³ Bo nsi ghù tshen tshu là, nummbe bo lo ke lèn Tà, ke lèn mba me.

⁴ Là me lo tshob tshen tshu li bin, ndùlala ndù ngelaṅ ze yub ngelaṅ nsi ku' là, bin kwimte ndù me lo à tshob tshu là bin. Là me lo ke tshob tshen tshu là bin fe neto'te, nummbe me lo be bag à bin,

⁵ là ndonni, me tshwèt nèn tèt mèn z'a tum àm nà, là sàm mèn netèt bin ke bètt'àm ndù: O nèn à yà?

⁶ Là mba me na' ntshob tshen tshu là bin nà, ntù tsin dun zwe.

⁷ Là me tshob à nenùn bin: A b'a fu' bin ndù me nène, nummbe a be ze me ke' nèn nà, mba ngafitentù ke nsi se' bin. Là, a be ze me nèn nà, mba me nsi tum i bin.

⁸ Ngelaṅ z'a nsi se' là, a nsi la'te njù mba nukebwô be là, mba nunetsin be là, mba nu netsho'te ntsha be là.

⁹ Nukebwô: Nummbe bo ke' bam àm;

¹⁰ Nunetsine: Nummbe me tshwèt nèn tèt tà mbe ndù bin ke bèn neyen àm;

¹¹ nu netsho'te ntsha: Nummbe bo à tsho'te ntsha mfen yen njù li.

¹² Me bèn ngù tshu yàm netshob bin, là bin ke' ku'ni neket ndonni.

¹³ Là ngelaṅ a nsi se'e, yi Ywèt nunenùn nà, a nsi tshagte zin ntùm nenùn fa; nummbe a ke nsi tshob à num ze tu, a nsi tshob njoṅ tshu fa ts'a ju' là, bèn tshob tshu ts'a nsi se' là bin.

¹⁴ A nsi kuni àm, nummbe a nsi lo' ju ntùm z'a be yàm nà tshob bin.

¹⁵ Njoṅ tshu fa ts'a be Tà là b'a tshàm; a num ndùlala ze me tshob ndù a nsi lo' ju ntùm z'a be yàm nà tshob bin nà.

Ntage mba nka'ni

¹⁶ Num mo' mén ngelaṅ, bin ke nsi bèn yen àm, num mo' mén ngelaṅ, bin nsi bèn yen àm, nummbe me tshwèt nèn tèt Tà.

¹⁷ Ndùlala tsemo' ben netèt ghazi'te nu i tshob bo bo ndù: Yen ju li z'a tshob be ndù: Num mo' mén ngelaṅ bin ke nsi bèn yen àm, num mo' mén ngelaṅ bin nsi bèn yen àm, mba ndù, nummbe me tshwèt nèn tèt Tà là, b'a ndùke?

¹⁸ Ndùlala bo nke ntshob ndù: Yen ju z'a tshob ndù: Num mo' mén ngelaṅ nà b'a ndùke? Bag ke' lèn ju z'a tshwèt ntshob là.

¹⁹ Yésu lèn ndù bo tshwèt nkwate nebètt'é nu, ntshob bo ndù: Bin tshwèt ndiag netèt bin nelèn ju ze me tshob ndù: Num mo' mén ngelaṅ, bin ke nsi bèn yen àm, num mo' mén ngelaṅ, bin nsi bèn yen àm nà.

²⁰ Kua' nenùne, kua' nenùne, me tshob bin ndù: Bin nsi kua', làne, là njù nsi tsiaṅte; bin nsi tswe zwe, là sin zwe nsi kaṅ tù' tsiaṅte.

²¹ Mènnzwi num mb'a ntùm zwe ngelaṅ z'a tshwèt mbwe là, nummbe ze ngelaṅ ku'u. Là ngelaṅ z'a bwe là, a ke bèn nekwimte nge', num tsiaṅte mba mènntùn se' ntùm njù là.

²² Ndùlala mba bin zin b'a ntùm zwe ndonni, là me nsi bèn yen zine, ntù tsin tsiaṅte, sàm mèn ke nsi kwé tsiaṅte zin bin.

²³ Num sen lé'njù là bin ke nsi bètt'àm sàm nu. Kua' nenùne, kua' nenùne, me tshob bin ndù: A be ze bin bètte ju Tà là, mb'a nsi fà bin num lén sàm.

²⁴ Tà nkum ndonni bin ke' yoṅ nto' bètte ju num lén sàm; bin bètte bin nsi kwé ndù tsiaṅte zin dune.

²⁵ Me lo tshob tshen tshu là bin à ngùme; ngelaṅ tshwèt nku'u, ze me ke nsi bèn tshob nu bin à ngùm nà, là ze me nsi soṅ zin nu num Tà be ndaṅndaṅ nà.

²⁶ Num sen lé'njù là bin nsi bètte ju num lén sàm; là, me ke' tshob bin ndù me nsi le'te Tà num zin tu.

²⁷ Nummbe tu wut Tà be nkô zine, mba bin be nkô àm, mba ndù bin lo bam ndù me tum à num Tà là.

²⁸ Me lo tum num Tà, nse' ntùm njù, me tshwèt mbèn mfaṅ njù nèn tèt Tà.

²⁹ Ghazi'te nu i tshob ndù: Tshù, ndonni o tshwèt ntshob à ndaṅndaṅ ke bèn ntshob à ngùme.

³⁰ Ndonni bag lèn ndù o lèn njoṅ tshu fa, mba ndù o ke' diag ndù sàm mèn bètt'o nu; a num ndùlala ze bag bam ndù o fe à Nsi là.

³¹ Yésu bùnte bo ndù: Ndonni bin bam ké?

³² Tshù, ngelaṅ tshwèt nku'u, ndù à ku'u, ze bin nsi sate, mba we lo nèn ze bag, là bin faṅ àm tù' me là. Là, me ke' b'a tù' me, nummbe bag Tà bèn mbe.

³³ Me lo tshob tshen tshu là bin, ndùlala ndù bin ghù fite num àm. Bin à yen nge' ntùm njù, là bin fèn ntù, nummbe m'a tshùa njù.