Yohané 13 - NTSHOB NSI

Mba Yésu sôg nku ghazi'te nu i là

¹ Ndùlala lé'njù jùa Pasa lo be ku'u, Yésu be lèn ndù ze ngelaṅ ku' nelo ntùm yen njù li nèn ntèt Tà; a kô tse ben tse bo be ntùm njù là, nkô yub tà nèn miagte.

² Bo lo be to' nejù jujù ndù Satan à ma' ntùm ntù Yuda mén Simon ze Iskariot, nu neswèn i.

³ Yésu be lèn ndù Tà lo fà njoṅ tshu fa ntùm mbu mi, ndù a fe à Nsi, mbèn nke nèn tèl à Nsi,

⁴ ndo téblé, nsô nzwe tse, ndo' kam nzwe ntaṅ tun i,

⁵ naṅ ntse ntùm ka, nto' nesôg nku ghazi'te nu i, nke ndo' kam nzwe z'a taṅ tun i là, ntshwétte yi.

⁶ Ndùlala a kum num Simon Pétro, Pétro tshob yi ndù: Tshùaben, o bèn sôg nku màm ké?

⁷ Yésu bùnte ntshob yi ndù: Ju ze me tshwèt ngù là, a b'o ke lèn ndonni, là o nsi ju' à ngelaṅ mànjam.

⁸ Pétro tshob yi ndù: Nga, a b'o ke na' nzi nsôg nku màm, Yésu bùnte yi ndù: A be ze me ke' sôg o là, mb'o ke ghù yu bag i bag wù.

⁹ Simon Pétro tshob yi ndù: Tshùaben, ke b'a nda' nku màm, mba mbu màm, mba tu àm.

¹⁰ Yésu tshob yi ndù: Mèn z'a sôg wul i là ke' bèn mbe sôg, k'a ke nda' nku mi, là njoṅ wul i fa làn, mba bin nà, bin làn, là ke b'a njoṅ zin fa.

¹¹ Nummbe a lo lèn mèn z'a swèn i là, a num ndùlala z'a tshob ndù: Njoṅ zin fa ke' làn nà.

¹² Ndùlala ngelaṅ z'a sôg nku mub mbèn ndo' nzwe tse, ntswe num téblé là, a tshob bo ndù: Bin ju' ju ze me lo neghù bin nà ké?

¹³ Bin be ntsiaṅ àm ngatswite mba Tshùaben, bin tshob a bwô, nummbe me b'a yi.

¹⁴ Ndùlala, a be ze me sôg nku mine, me ze me b'a Tshùaben mba ngatswite là, mb'a bwô ndù mba bin ke nsôg nku min bin bin.

¹⁵ Nummbe me lo nef'a mfi' bin, ndùlala ndù mba bin zin ghù be ndaṅndaṅ mba me ghù num bin nà.

¹⁶ Kua' nenùne, kua' nenùne, me tshob bin ndù: Ngafa' ke' b'a mèn ndùb ntshùa Tshùaben i, ke ngantum no ke bèn mbe mèn ndùb ntshùa mèn z'a tum i là.

¹⁷ Bin nsi b'a ghafen, a be ze bin lèn tshen tshu li mbèn nke nze là.

¹⁸ Me ke' tshob à njoṅ zin fa; me lèn ben tse m'a tsho' yub là, là, a b'a ndù ṅwa'ni Nsi bumte: Mèn z'a num njù bàn àm nà tsho' tun ku i nsi num àm.

¹⁹ Fe ndonni me tshob bin kà yen nu là se'e, ndùlala ndù ngelaṅ z'a nsi se' là, bin bam ndù me b'a yi.

²⁰ Kua' nenùne, kua' nenùne, me tshob bin ndù: Mèn z'a lo' mèn ze me nsi tum i là, lo' àm; là mèn z'a lo' àm nà, lo' mèn z'a tum àm nà.

Mba Yésu soṅ mba Yuda nsi swèn i là

²¹ Yésu tshob tshen nu là, mvètte ntùm Ywèt tse, nkwé nta ntshob ndù: Kua' nenùne, me tshob bin ndù: Mo' mèn netèt bin nsi swèn àm.

²² Ghazi'te nu i lôte wut tshob bo bo, nu tshùa yube, bo ke lèn mèn z'a tshwèt ntshob là!

²³ Mo' mèn netèt ghazi'te nu i, yen nà ze Yésu ke nkô i là lo be téblé mbaṅ Yésu.

²⁴ Ndùlala Simon Pétro tshob yi lèn ndù: Bètt'é mèn z'a tshwèt ntshob là!

²⁵ Yen ni ben wul i num ndàntù Yésu, ntshob ndù: Tshùaben, a b'a we?

²⁶ Yésu bùnte ndù: A b'a yen ni ze me nsi tshe' nke' bàn fà yi là. Ndùlala a tshe' bàn ndo' mfà Yuda mén Simon ze Iskariot.

²⁷ A kwé nke' bàn be ngelaṅ mbile, Satan tsho num i; Yésu tshob yi ndù: Ju z'o tshwèt ngù là, ghù kua' ndende.

²⁸ Là sàm mèn netèt tse bo be téblé là ke ju' ju z'a tshwèt ntshob yi là.

²⁹ Nummbe tsemo' lo ke nkwate ndù mba Yuda na' mbèn nke ndé' mfe' là, Yésu ke ntshob yi à ndù: Jun ju z'a bwoṅ ben mum lé'njù jùa là ke ndù a fà ju bwoṅbwoṅ lo.

³⁰ Ndùlala a be kwé nke' bàn, ntum be ndùse. Là, a na' mb'a tèttswe'.

Ntshù' nswe

³¹ Ndùlala, ngelaṅ ze Yuda tum nà, Yésu tshob ndù: Ndonni Mén mèn tsho ntùm nkuni mi, nkuni Nsi tswite wul i num i.

³² A be ze nkuni Nsi tswite wul i num i là, mba Nsi kuni tu wul i, mb'a nsi kuni i be kua' ndende.

³³ Bontsit bônke', bag à bin bèn mbe num mo' mén ngelaṅ; bin nsi diag àm; mba me na' ntshob ba Yuda là: Bin ke' ku'ni nese' dù' ze me tshwèt nèn nà, me tshwèt ntshob mba bin zin ndonni.

³⁴ Me fà ntshù' nswe bin ndù: Bin ke nkôni bin bin; mba me kô zin nà, mba bin zin, bin ke nkôni bin bin.

³⁵ A num yen nà ze njoṅ benntùn fa nsi lèn ndù bin b'a ghazi'te nu àm nà, a be ze bin ghù nkôni bin bin nà.

Nebètte Pétro

³⁶ Simon Pétro tshob yi ndù: Tshùaben, o nèn à yà? Yésu bùnte ndù: Dù' ze me tshwèt nèn nà, o ke' ku'ni ndonni netam njam àm, là o nsi tam njam àm ngelaṅ mànjam.

³⁷ Pétro tshob yi ndù: Tshùaben, numke be me ke ku'ni ndonni netam njam o à? Me nsi fà yôg sàm num o.

³⁸ Yésu bùnte ndù: O nsi fà yôg so num àm à? Kua' nenùne, kua' nenùne, me tshob wù ndù: Kù'ngab ke nsi tô, ke be ndù o gha àm yoṅ tat.