Yohané 11 - NTSHOB NSI

Mba Yésu bam Lazaro num vù là

¹ Mo' ngangokèt lo be bwe, Lazaro ze Bètania, ngô Maria mba Marta ngon màab.

² A b'a Maria yen nà z'a na' njo' Tshùaben mfèt labinda, ntshwétte nku mi nyiaṅtu tse, ze mfèl i Lazaro ke ngon nà.

³ Ndùlala tshen fèt tse bènnzwi li tum bo tshob Yésu ndù: Tshùaben, tshù, mèn z'o num nkô i là tshwèt ngone.

⁴ Yésu be ju' ntshob ndù: Yen ngokèt là ke b'a ze vù, là, a b'a num nkuni Nsi, ndùlala ndù nkuni Mén Nsi tswite wul i num i.

⁵ Yésu lo ke nkô Marta mba ngon màab, mba Lazaro.

⁶ Ndùlala ngelaṅ a ju' ndù Lazaro tshwèt ngon nà, a ghô dù' z'a be là lé'njù bàa.

⁷ Yen nà lo be tshùa, a tshob ghazi'te nu i ndù: Be bèn nèn mà Yudéa.

⁸ Ghazi'te nu i tshob yi ndù: Rabbi, a b'a lé'mo' ze ba Yuda ke ndiag netamt'o ndoṅ nà, o tshwèt mbèn nke nèn bwe ké?

⁹ Yésu bùnte ndù: Mbwôgtshù ke' ghù nyam ntshob bàa gham ké? A be ze mèn tshwèt nzin mbwôgtshù là, mb'a ke tsham ku i; nummbe a tshwèt njen nka' yen njù li.

¹⁰ Là, a be ze mèn tshwèt nzin tèttswe' là, mb'a' tsham ku i, nummbe nka' ke' be num i.

¹¹ A tshob yen nà bo, mbèn ntshob ndù: Lazaro nshun be zi: M'a' nèn mbam i.

¹² Ndùlala ghazi'te nu i ntshob yi ndù: Tshùaben, a be z'a zi là, mb'a nsi yôge.

¹³ Là Yésu ke ntshob à vù se, là bo kwate ndù a tshob à nezi miaglo.

¹⁴ A ndùlala Yésu tshob bo ndaṅndaṅ ndù: Lazaro kwù.

¹⁵ Me tsiaṅte num bin, ndù bin bame, mba me na' mbe ke be bwe là. Là be nèn mbam i.

¹⁶ Ndùlala Tomas ze bo ke ntsiaṅ Didime là tshob ghazi'te nu Yésu ndù: Mba be ze be nène, ndù be kwù bag à bin bo.

¹⁷ Ndùlala Yésu be kume, ntèt ndù a be lé'njù kuà mb'a be ntùm fi là.

¹⁸ Bètania lo ghebte Yérusalém nguan mfi' ntshob tàn gham.

¹⁹ Ben yàm netèt ba Yuda lo se' mbaṅ Marta mba Maria ndù bo fite ntù tshob num nu mfèt yub.

²⁰ Ngelaṅ Marta ju' ndù Yésu tshwèt nse' là, a nèn mbumte bo yi, là Maria lo be ndà ndù a tswe nsi.

²¹ Ndùlala Marta tshob Yésu ndù: Tshùaben, o na' mbe nsen ni mba mfèl àm lo ke kwù.

²² Mba ndonni me lèn ndù njoṅ tshu fa ts'o bètte Nsi là, Nsi nsi fà wù.

²³ Yésu tshob yi ndù: Mfèl o nsi lo num vù.

²⁴ Marta tshob yi ndù: Me lèn ndù a nsi lo num vù ngelaṅ nelo num vù ntùm miagte lé'njù.

²⁵ Yésu tshob yi ndù: Tu wul àm me b'a nelo num vù mba yôg. Mèn z'a bam àm nà, a be z'a kwù mba nekwù là, mb'a nsi yôge.

²⁶ Mba we lo z'a tshwèt njôge, mbam àm nà ke nsi kwù yoṅ ntshù', o bam yen nà ké?

²⁷ A tshob yi ndù: Ṅ, me Tshùaben, me bam ndù o b'a Kristô Mén Nsi z'a se' ntùm njù là.

²⁸ A tshob yen nà, nèn ntsiaṅ Maria ngon màab njam tsham, ntshob ndù: Ngatswite b'a nsen ni, a tshwèt ntsiaṅ o.

²⁹ Yen ni yoṅ mbe ju'u, ndo nsi ndende nèn mbaṅ i.

³⁰ Yésu lo ke yoṅ ntsho ntùm ngô, là, a na' nke' à dù' ze Marta bumte bo yi là.

³¹ Ndùlala ba Yuda tse bo be boa Maria ntùm ndà, tse bo ke mfite ntù i là, be yen mb'a lo nsi ndende ntum nà, ntam njam i, nke nkwate ndù a nèn à tufi num nelàn bwe.

³² Ndùlala Maria kum dù' ze Yésu be là, mbe yen i, ngwù num nku mi ntshob yi ndù: Tshùaben, o na' mbe nsen ni mba mfèl àm lo ke kwù.

³³ Ndùlala Yésu be yen mb'a tshwèt ndàne, mba ba Yuda tse bo se' bo à bo bèn nke ndàn yub là, wul i fét, tu i tshu'.

³⁴ A tshob ndù: Bin yab i à yà? Bo tshob yi ndù: Tshùaben se' njene.

³⁵ Yésu fètte ntsenyà.

³⁶ Ndùlala ba Yuda nke ntshob ndù: Tshù mb'a ke nkô i njene!

³⁷ Là tsemo' netèt bo tshob ndù: Yi z'a na' nga' miag mfùmiag là, lo ke ku'ni neghù ndù kà yen mèn ni kwù ké?

³⁸ Ndùlala wut Yésu bèn mféle, a nèn mbaṅ tufi. A na' mb'a ngabloṅ ndù bo kabte mo' loṅ ntshu bwe.

³⁹ Yésu tshob ndù: Bin ket loṅ! Marta ngonmà mfe tshob yi ndù: Tshùaben a ke ndame, nummbe a b'a lé'njù kuà mb'a be bwe là.

⁴⁰ Yésu tshob yi ndù: Me lo ke tshob wù ndù a be z'o bam nà, mb'o a' yen nkuni Nsi ké?

⁴¹ Ndùlala bo ket loṅ. Là Yésu bù' miag mi tù ntshob ndù: Tà, me labt'o mb'o ju' àm nà.

⁴² Mba me là, me lo lèn ndù o num nju' àm njoṅ ndù fa, là me tshob yen ni à num bwoṅ benntùn z'a diaṅ àm mbum nà ndù bo bam ndù a b'a wù bèn ntum àm.

⁴³ A tshob yen nà, nkua' nze neta ndù: Lazaro, tume, se' li!

⁴⁴ Mfe tum, ndù bo kut nku mi mba mbu mi nzwe, se i ndù bo lam kam nzwe. Yésu tshob ndù: Bin kiagt'é, mfaṅ i a nène.

Mba ghakwé mbwe ba Yuda diag nezwi Yésu là

⁴⁵ Ndùlala ben yàm netèt ba Yuda tse bo se' mbaṅ Maria, njen ju ze Yésu ghù là bam i.

⁴⁶ Là tsemo' netèt bo nèn mbaṅ ba Férésia, ntshob ju ze Yésu ghù là bo.

⁴⁷ Ndùlala ghale'te Nsi tse ndùbndùb mba ba Férésia tsiaṅ ntse'te ghatsho'te ntsha, ntshob ndù: Be ghù ndùke? Nummbe yen mèn nà tshwèt ngù nsà yàme.

⁴⁸ A be ze be faṅ i ndùlala là, mba njoṅ benntùn fa nsi bam i, mba ba Roma nsi se' bagte mba dù' be, mba ngô be.

⁴⁹ Là mo' mèn netèt bo, Kaïfa z'a na' mbe ngale'te Nsi ze ndùb yen ngu'njù là là tshob bo ndù: Bin ke' lèn sàm ju,

⁵⁰ bin ke' yen ndù a b'a bin zin mb'a be ta' mèn kwù num tu njoṅ benntùn fa, ndù kà njoṅ ngô fa bi là.

⁵¹ A lo ke tshob yen nu l'a ze tu, là mb'a be ngale'te Nsi ze ndùb yen ngu'njù là là, a tshob mba ngatshob ntshob Nsi là ndù Yésu nsi kwù num tu ngô i.

⁵² Ke b'a nda' num tu ngô i, là mba ndù a tse'te bon Nsi tse bo sate là, bo tù' ntshù'.

⁵³ Ndùlala fe num sen lé'njù là, bo nabte ndù bo zwi i.

⁵⁴ A ndùlala Yésu ke bèn nezinte netèt ba Yuda ndaṅndaṅ, là, a tum yen dù' là, nèn bag ngô z'a be mbaṅ kônkwa, ntùm mo' ngô lén se Efraim nà; a tswe bwe boa ghazi'te nu i.

⁵⁵ Là Pasa ba Yuda lo ghebte. Benntùn yàm nke ndo ntùm bag ngô, nko' nèn Yérusalém num nelànte wut tshob kà Pasa ku'u.

⁵⁶ Ndùlala bo nke ndiag Yésu, nke ntshob bo bo ndù bo tsinte ntùm ndà Nsi ndù: Bin kwate ndùke? Ndù a ke se' mum lé'njù jùa ké?

⁵⁷ Là ghale'te Nsi tse ndùbndùb mba ba Férésia lo tshob ndù a be ze mèn lèn dù' z'a be bwe là, a la'te, ndù bo tshùb i.