Yohané 10 - NTSHOB NSI

Ngabéb mbwe ze mebwô

¹ Kua' nenùne, kua' nenùne, me tshob bin ndù: Mén z'a ke' tshùa à nzendà kà ntsho kin mbwe, là ndul à dù' ghua kà ntsho bwe là, b'a ntshô mba fimntshu.

² Là mèn z'a be ntshùa nzendà kà ntsho bwe là b'a ngabéb njùmbwe.

³ Ngabéb nzendà num nga' nzendà yi, njùmbwe ju' nz'é; a num ntsiaṅ njùmbwe tse lén sube, ntum bo njù.

⁴ A num mbe ngelaṅ z'a tum njoṅ tse njùmbwe fa njù là, a zin mbwe bo, njùmbwe tam njam i, nummbe bo lèn nz'é.

⁵ Là be bo ke tam njam ngùn, là be bo kù i à nekù, nummbe bo ke' lèn nze ghùn.

⁶ Yésu tshob men ntshob ngùm ni bo, là bo ke lèn nu z'a ke ntshob bo là.

⁷ Ndùlala Yésu bèn ntshob mo' yoṅ i ndù: Kua' nenùne, kua' nenùne, me tshob bin ndù: Tu wul àm, me b'a nzendà njùmbwe.

⁸ Njoṅ ben fa tse bo bwôg se' me là b'a tshô mba ba fimntshu, là ba njùmbwe lo ke ju' yube.

⁹ Tu wul àm, me b'a nzendà. A be ze mèn tshùa num àm kà ntsho là, mb'a nsi yôge, mb'a nsi tsho, bèn tume, fon dù' nenà.

¹⁰ Ntshô ke nse' à be nda' num neyi, num nezwi, mba num nebagte. Tu wul àm, me se' à ndù bo ghù yôg, mbèn ngù ntshùate.

¹¹ Tu wul àm, me b'a ngabéb mbwe ze mebwô. Ngabéb mbwe ze mebwô num mfà yôg se num njùmbwe.

¹² Ngafa' z'a ke' b'a ngabéb mbwe, ze njùmbwe ke' b'a ko' tse là, num njen mba nzwimàntô se' là, mfaṅ ba njùmbwe, nkù tse, nzwimàntô ghom tsemo'o, nsate tsemo'o.

¹³ Nummbe a b'a ngafa', mbe ndù a ke' be nywin tse num njùmbwe.

¹⁴ Tu wul àm, me b'a ngabéb mbwe ze mebwô, me lèn njùmbwe tshàm, njùmbwe tshàm bèn ndèn àm.

¹⁵ Be ndaṅndaṅ mba Tà lèn àm, mba me yàm bèn ndèn Tà là, me fà yôg sàm num njùmbwe.

¹⁶ Me ghù tsemo' njùmbwe tse bo ke' be ntùm sen kin ni là. A bwô ndù me tshagte mba bo yub; bo nsi ju' nz'àm; bwoṅ njùmbwe nsi b'a ntshù'; ngabéb mbwe be ntshù'.

¹⁷ A num ndùlala Tà num nkô àm, nummbe me fà yôg sàm kà bèn kwé mo' yoṅ i.

¹⁸ Sàm mèn ke' kwé i me, là me bèn mfà i tu wul àm. Me ghù ngù' nefà i, me bèn ngù ngù' nekwé i mo' yoṅ i, yen ni b'a ntshù' me na' nkwé Tà là.

¹⁹ Fagte bèn ngwù netèt ba Yuda mo' yoṅ i num men ntshob là.

²⁰ Benntùn yàm netèt bo nke ntshob ndù: A ghù ywètkebwô, a b'a mbabune; bin ke nju' i numke?

²¹ Tsemo' bèn nke ntshob ndù: Men ntshob là ke b'a mi mèn z'a ghù ywètkebwô là. A be ywètkebwô ku'ni negha' miag ba mfùmiag ké?

²² Lé'njù nekwimte nelànte ndà Nsi mà Yérusalém se'; a na' mb'a ndùsàne.

²³ Yésu nke nzinte ntùm ndà Nsi, ntùm bam ntshundà Salomon.

²⁴ Ndùlala ba Yuda diaṅ i mbume, nke ntshob yi ndù: O a' ghù ntù tshag tswe ke nemagt'a ndùke? A be z'o b'a Kristô là, o tshob bag ndaṅndaṅ.

²⁵ Yésu bùnte bo ndù: Me lo tshob bin, bin ke bam, mfa' mi me tshwèt mfa' num lén Tàa là, a men mfa' là bèn nke nkwé nta màm.

²⁶ Là bin ke bam, nummbe bin ke b'a njùmbwe tshàm.

²⁷ Njùmbwe ts'a b'a tshàm nà num ndèn nz'àm, me lèn yube, bo num ntam njam àm.

²⁸ Me num mfà yôg matmat bo, bo ke nsi bi yoṅ ntshù', sàm mèn ke nsi sô yub bu àm.

²⁹ Ju ze Tàa fà me là b'a ze ndùb ntshùa njoṅ i fa, sàm mèn ke' ku'ni nesô i ntùm bu Tà.

³⁰ Me mba Tà, bag b'a ntshù'.

³¹ Ba Yuda lo' ndoṅ mo' yoṅ i netamt'é yi,

³² Yésu bùnte bo ndù: Me lo la'te mfa' yàm mi mebwô, mi a fe Tà là bin, bin tamt'àm ndoṅ à num sit fa' netèt men mfa' l'à?

³³ Ba Yuda bùnte yi ndù: Bag ke' tamt'o ndoṅ à num fa' mebwô, là num tshabte: Nummbe o b'a mènntùn, nke ndo' tu wul o ngù Nsi yi.

³⁴ Yésu bùnte bo ndù: Bo ke' kite ntùm ntshù' zin ndù: Me lo tshob ndù: Bin b'a ba nsi ké?

³⁵ Ṅ, Nsi tshob ndù ben ts'a tshob ntshob mi bo là b'a ba nsi, (be mèn ke ku'ni nebagte ṅwa'ni Nsi);

³⁶ là bin tshwèt ntshob mèn ze Nsi lànt'é ntùm njù là ndù: O tshwèt ntshabte. Nummbe me lo tshob ndù: Me b'a Mén Nsi;

³⁷ a be ze me ke tshwèt mfa' mfa' Tàa là, kà bin bam àm.

³⁸ Là, a be ze me tshwèt mfa' là, bin ke bam àm nà, bin bam men mfa' là, ndùlala ndù bin lène, mbèn mbam ndù Tà num num àm, me be num Tà.

³⁹ Ndùlala bo bèn nke ndiag mo' yoṅ i netshùb i, là Yésu tum ntùm mbu mube.

Mba Yésu nèn mo' yoṅ Yordan nà

⁴⁰ A bèn nèn mo' yoṅ Yordan dù' ze Yohané nyu' benntùn bwe ntse là, ntswe bwe.

⁴¹ Benntùn yàm se' mbaṅ i, nke ntshob ndù: Yohané lo ke ghù sàm nsà, là njoṅ tshu fa tse Yohané tshob num yen mèn ni là b'a nenùne.

⁴² Benntùn yàm bam i yen dù' là.