Yoél 2 - NTSHOB NSI

Lé'njù Tshùaben

¹ Bin tô nta mà Sion, ntshag nze zin tù num mbal àm ze nelàne. A bwô ndù njoṅ ba ntùm ngô fa vètte, nummbe lé'njù Tshùaben tshwèt nse'e, ndù a lo à ghebte.

² Lé'njù njame, lé'njù nesènte, lé'njù ndot mba ṅame. Ndaṅndaṅ mba mfôgnjù be ṅwag num tu mbat là, be ndaṅndaṅ mo' nzwit mèn z'a yàm mbèn nta là tshwèt ngebte; lèn i ke' to' yoṅ mbe, mbe ndù lèn i ke nsi ghù bèn be njam i, njoṅ ngu'ngu' fa.

³ Mbwôg num mbwe i nke nkù, lambwôg be njam i nke mbabe; ngô lo be mbwe i à mba nka' Edèn nà, là ndùs'a tôg là, a tù' b'a bagkèt kônkwa, sàm ju ke' tum ntshu i.

⁴ Me num njen i ntshù mi b'a ntshù ba nyàmdiaṅe, bo ke nkù nde à mba ghako' nyàmdiaṅ nà.

⁵ Tshu'te yub b'a mba ze nkalig mi bo tshwèt mbùn num tu mbat nse' là, tshu'te yub be mba ze lambwôg z'a tshwèt nkù nyi'nga là; bo b'a mba nzwit mèn neta z'a tse'te nele' ntsho là.

⁶ Ntumntum tshwèt mvètte mbwe i, se njoṅ benntùn fa tshùaṅ.

⁷ Bo tshwèt nkù nde ba neta sa'nde' là, bo tshwèt nko' num kumba' mba ghama' ntsho là, mba we lo nke nèn num ze manze, ke fàn nze nèn dù' ghua.

⁸ Bo ke' be fét dù' ntshù', mb'a be mèn tèn mfèl i là, bo num nke ntôgt'a netèt nkét, nke nkùmte mba bo tsin nka là.

⁹ Bo tsho' ngwù ntùm ngô, bo tshwèt nkù nde num kàbngô, nko' num mba', nke ntsho num ntôndà mba tshô là.

¹⁰ Tsha' tshwèt nyi'te mbwe bo, kamànyam tshwèt mvètte, lagnyam mba maṅwù tam njame, nsa ke' bèn neké'é.

¹¹ Tshùaben ghù bo ju' nz'é mbwe ntshu ntsho i; ze mbàn zi neshu, ngaghù ju z'a tum ntshu i là b'a nganeta, nummbe lé'njù Tshùaben ghu' neshu, nkuni neshu. We z'a ku'ni nefènte sen lé'njù l'à?

¹² Tshùaben bèn ntshob ndonni ndù: Bin nse' ntèl àm njoṅ ntù tsin fa, ntùm netswe nziku'u, ntùm ntsenyà, ntùm nelàne.

¹³ Bin fagt'a ntù tsine, ntshùa nefagt'a nzwe tsine; bin bèn njam ntèt Tshùaben Nsi zin, nummb'a b'a bétni mèn, mbe ngakondèn, mbe ngafènte, ndù kondèn gha' mbu yi, a be mbate nkwatenu mi mbwe nge' mènntùn.

¹⁴ We z'a lèn ke mo' ndù Tshùaben nsi be bèn njam kaṅ ntù i à, naṅ mbotni num bin, bin fà ju bwôntù mba netshùm ndu' nsi Tshùaben Nsi zin.

¹⁵ Bin tô nta mà Sion! Bin ghù benntùn tswe nziku'u, bin tsiaṅ mbumte ndùb!

¹⁶ Bin tse'te ngô, nabte mbumte nelàne, nkùmte ywèn benntùn, ntse'te bonfi, mba tse bo ke' nyô bùn nà. A bwô ndù mandum z'a yôg nenandà tum ndà i, nzwingùn tum to'ndà i.

¹⁷ A bwô ndù ghale'te Nsi tse bo be ghafa' Tshùaben nà tsin nzendà bo tômbwôg le'te Nsi, nkua' ntshob ndù: Tshùaben béb ngô o, kà kag ntsi' mu ntùm tuswe, ndù ba tum tshabte yub ntshob ndù: Nsi yub b'a yà?

¹⁸ Tshùaben num nkô ngô i, a ko ndèn ben tse.

Nka'ni

¹⁹ Tshùaben bùnte ntshob ngô i ndù: M'a' tum nsa, ngefele, mba mfèt bin, bin nsi ywèle. Me ke nsi bèn kag zin tuswe netèt ba tum.

²⁰ M'a' ta' ngakeban z'a tu là, ntshag i nesà, me nsi tshag i num dù' tsha' z'a ghage, njum nà. Me nsi tshag ze mbwe ntshu ntsho mà dibantse z'a bag ntumnyam nà; tshag z'a be njam nà dibantse z'a bag mbinyam nà. Nsém i nsi ko'o, ndam mi ko'o, nummb'a yab nu t'a tshùa.

²¹ Kà bwôg me tsha'a, tswe ntùm ṅwate mbèn ntsiaṅte tsho, nummb'a Tshùaben bèn nke njab nu tse ndùbndùb ndonni.

²² Kà bin bwôg me nyàm tshwèt, nummbe nenà bit num nà ts'a kônkwa là, tù yàm tàm se, mbatsi mba nkùa fà fu'.

²³ Bon Sion, bin ṅwate, bin tsiaṅte num Tshùaben Nsi zin nummb'a nsi fà mbaṅ sàn bin, ndo' ngù mebwô yi. A ghù mbaṅ ndùbndùb lo num bin, ngù mbaṅ sàn mba mbwe mbaṅ lo, mb'a na' mbe mbwembwe là.

²⁴ Miag nsa dun dù' netsham nsa, ndu' dunte ntùm ntu' ndu', mfèt nswe dunte ntùm ntshaṅ tshab.

²⁵ Me nsi bate ngu'njù tse ngamntàn, tànnkùa, kù'nga, ntsetàn, ntshu ntsho àm, ze ndùb, ze me tum njam bin bagte là.

²⁶ Bin nsi jù ywèle, nyàmte lén Tshùaben Nsi zin, z'a ghù njoṅ i fa mbwe bin ntùm nkuni là. Tuswe ke nsi zi bèn ko yàm nzwit mèn!

²⁷ Bin nsi lèn ndù me b'a netèt Israél, me Tshùaben, Nsi zin, ke b'a mo' ze ghua! Tuswe ke nsi zi ko yàm nzwit mèn!