Yoél 1 - NTSHOB NSI

Bwoṅ ngamntàn ngô. Ntag mfà num nekaṅ ntù

¹ Ntshob mi Tshùaben na' ntshob Yoél nshum Bétuél là.

² Ywèn benntùn, bin ju' yen nu li, bin kù' ntoṅ min njoṅ zin fa me ba ntùm ngô! Yen lèn nu li lo to' be mum tsin lé'njù ke mum tse tà tsin no ké?

³ Bin soṅ bon tsin yen nu là, bon tsin soṅ tshob bon, tshob bon soṅ zwiaṅ mèn z'a nsi tum njam nà.

⁴ Ngamntàn lo fèt tshé' ju ze ntsetàn faṅ nà. Tànnkùa lo fèt tshé' ju ze ngamntàn faṅ nà. Kù'nga lo fèt tshé' ju ze tànnkùa faṅ nà.

⁵ Ghabum ndu', bin bam num miaglo, ndàne. Njoṅ zin fa ghanu ndu' tsham zwe, num nu nzit nkùa mi bo tsho' ntshu bin nà.

⁶ Nummbe mo' bwoṅ ngamntàn lo' ngô yage, ndù a ta, mbèn njàm kà mbe be mèn ke siaṅ ze. A ghù nsô mba mi ngwayit là, ngù ngagntshu mba ze ngon ngwayit là.

⁷ A bagte nkùa tshag, ntshu'te ntù mbatsi mag fa nkamnkam; a fétte yub fa ngua'a; nkaṅ mi fôg fa.

⁸ Làn wul o mba mènnzwi z'a taṅ nkùvù, nke ndàn ndu i ze bo yi lo ngon nà!

⁹ Nefà ju bwôntù mba netshùm ndu' nsi mi ntùm ndà Tshùaben. Ghale'te Nsi tse bo be ghafa' Nsi là b'a nsi vù.

¹⁰ Tshwèt bagte fa, tsha' tshwèt ndàne, ngefet ke bèn mbe, ndùmte ndu' ke bèn mbe, mfèt kut nta ndù ntoṅ.

¹¹ Tuswe ko ghadù' nà, ghadiaṅ nkùa nke tsham zwe, num nu ngefet mba num nu nsa, nummbe tshu netsho' num nà bi.

¹² Nkùa jum fa, mbatsi yub fa, tù mbù, tene, tù tshom, njoṅ ntù fa mi a fèn nà jum; tsiaṅte mi netèt bon mèn nyiaṅtu.

¹³ Ghale'te Nsi, bin taṅ kob tun bin, ndàn wut tsine, a bwô ndù ghaton tshu tômbwôg tsham zwe, bin tôg nke'mbàm, nse' nzi nsivù, me ghafa' Nsi àm. Nummbe nefà tshu bwôntù mba netshùm ndu' nsi mi, ntùm ndà Nsi zin.

¹⁴ Bin tshob ngô tswe nziku'u, ntsiaṅ ta' ntse'te ndùb; bin tamte ywèn benntùn dù' ntshù', mba njoṅ ba ntùm ngô fa, ntùm ndà Tshùaben Nsi zin. nkua' ntsiaṅ Tshùaben.

¹⁵ Bwe'e! Lé'njù nge' tshwèt ngebte, Lé'njù yantù Tshùaben, bo nebagte z'a fe à Ngaghù mba' neta là be tshwèt nse'e.

¹⁶ Bo ke' sô jujù num miag mag ké? Tsiaṅte bo ṅwate ke' mi ntùm ndà Nsi be ké? Nzwit tshu jum bam tsha'a

¹⁷ nkandà ke' bèn nebe, njoṅ nta fa sate. Nummbe nsa jum fa.

¹⁸ Ju' mba nyàm tse bo be ntswe ndà tshwèt nkua' njene! Tshù mba bwoṅ nyàm tshwèt ntsha njene, nummbe bo ke' ghù nenà; mba bwoṅ mbwe b'a ntùm nge' yàme.

¹⁹ Me ke nkua' ntsiaṅ à wù me Tshùaben; nummbe mbwôg kù nà ts'a kônkwa là, lambwôg bàb njoṅ ntù fa tshwèt.

²⁰ Mba ba nyàm tshwèt nke nkua' ntsiaṅ à wù. Nummbe nta'ntse jumte fa. Mbwôg kù njoṅ nà fa kônkwa.