Yobkwi 99 - NTSHOB NSI

Tshùaben b'a mfen, ndù a làn

¹ Tshùaben tshwèt nsa' njù, benntùn nke mvètte; a tswe num ba kérubim, tsha' nke nyi'te.

² Tshùaben b'a mèn ndùb mà Sion. A b'a mfe tù num njoṅ benntùn fa.

³ Bo be nyàmte lén so se ndùb mba tonkèl i: A b'a nelàne.

⁴ A ta neshu, mfen z'a be nkô tsho'te ntsha là. A b'a wù bèn nke mféb nga nunenùn nsi. O be nte nunetsin mba nu ndaṅndaṅ, nke ngù njoṅ i fa Yakob.

⁵ Bin ghamte Tshùaben Nsi be, ngwù nsi mbwe ko'nku mi. A b'a Nelàne.

⁶ Mosé mba Aron lo be netèt ghale'te Nsi. Samuél lo be netèt ben tse bo be ntsiaṅ lén se là. Bo lo ke ntsiaṅ lén Tshùaben; a ju' bo.

⁷ A lo tswe ntùm la ndot, ntshob nu bo. Bo lo ze ntag mi, mba ntshù' mi a na' mfà bo là.

⁸ Tshùaben Nsi yag, o lo ju' bo. O lo be Nsi z'a be ndagte nu là num bo. Là, o lo naṅ ntsha num bo, num nukebwô tshobe.

⁹ Bin ghamte Tshùaben Nsi yag, ngwù nsi mbwe mbal i ze nelàne! Nummbe Tshùaben Nsi yag b'a nelàne.