Yobkwi 92 - NTSHOB NSI

Tshùaben! A bwô neghamt'o

¹ Yobkwi, yobkwi; num lé'njù Sabbat.

² A bwô neshu nenyàmte Tshùaben, neghamte lén so, me Nsi z'a be tà mfe tù là!

³ Neke ntshob kondèn o nkebnjù, mba nenùn o tèttswe'.

⁴ Num loṅ nsa gham mba num loṅe. Num nze loṅ nse'e.

⁵ O Tshùaben, o be ngù me nke ntsiaṅte njam mfa' mu! Me nke ndo' ṅwate njob kwi num fa' mbu mu.

⁶ O Tshùaben, mi'i mfa' mu zi neshu! Nkwatenu mu tsho neshu!

⁷ Femni mèn ke' ghù nelèn ju bwe. Nkagni ke bèn nz'é mb'a ku'ni là.

⁸ A be ze ghatshùagntù ke nku' nèn mbwe mba nenà là, a be ze njoṅ ghatshùagntù fa ke nte' là, mb'a b'a ndù bo biagte yub matmat.

⁹ Là tu wul o, o b'a Nsi z'a tà mfe tù là. O Tshùaben, o tswe matmat!

¹⁰ O Tshùaben, tshù ghakeban tsho, tshù ghakeban tsho li bo tshwèt mbite là. Njoṅ benntùn fa tse bo be ngù nukebwô là, bo sate yube.

¹¹ O be mfà neta nyatnyàm me. O zwi' àm mfèt nswe.

¹² Lag sàm be mfùag wut nelôte ghakeban tshàm, toṅ àm nke mfùag wut neju' bagkèt ghamaṅt'àm.

¹³ Ben netsin ke nku' à mba ten nà. Bo ke nsag à mba tù mbwe' Liban nà.

¹⁴ Mi bo bwe ntùm ndà Tshùaben, bo nke nsàm ntùm tse bam ntshundà Nsi yag là.

¹⁵ Bo be njwèn mba neywèn nke' njàm ntàme, ntse ke' num bo, bo nke nte'e,

¹⁶ ndù bo la'te ndù Tshùaben b'a mèn netsine, ndù a b'a sàm gholoṅ, mba ndù sàm nukebwô ke num i.