Yobkwi 90 - NTSHOB NSI

MBATTE ṄWA'NI KUÀ ( Yobk. 90—106 ) Mènntùn num ntôge, Nsi tù'

¹ Le'te Mosé, mèn Nsi. Tshùaben, o na' mb'a yag ndàlem. Ndùlala ngu'ngu'.

² Ba mbat lo be be, o lo be nabte tsha' mba njù, ndù o yà be Nsi fe ngu'ngu'.

³ O lo ghù benntùn bèn ntùm mbabe, o be ntshob ndù: Bon mèn nyiaṅtu, bin bèn mbène.

⁴ Nummbe ngu'njù ntsha' mbùm be num miag mu à mba nkôg, ndùs'a tôg là. A b'a mba ta' tèttswe' là.

⁵ O be ndo' yub nèn yi ndaṅndaṅ mba njem nà; bo b'a mba nenà ts'a be mbit nkebnjù là,

⁶ a be nsàm nkebnjù, nte'e, mbe mfetnjù ndabe, njume.

⁷ Yantù o biagte yage, tshùagntù o tshù'te yage.

⁸ O be njab mfànnu mag mbwe o, njab nukebwô tshag ts'a lem nà num nelàn z'a mbwe o là.

⁹ Yantù o be ngù lé'njù tshag nke mbite. Bag nke njen ngu'njù nèn mba nze fin be nèn nà.

¹⁰ Ngu'njù tshag be nèn nkum ṅam sammbàa. Tse tsemo' ben nke nkum ṅam fome mbe z'a fà bu là. Ko'tewut ze be bo ghù bwe là b'a ngùtni bo nge' neyene. Nummb'a be ntôg ndende, be tshùa ndù wat. Bag nke nkù nèn tèt vù.

¹¹ We z'a be nzete num neta yantù o, nku'ni neyen ntun tshùagntù o à?

¹² Tswite yag ndù bag lèn nesiaṅ lé'njù tshage. Ndùlala ndù bag yab zenu ntù bag.

¹³ Tshùaben, bèn nse'e, a nsi be ndùlala tà kum à ndùke? Ko ndèn ghafa' tsho.

¹⁴ Ke ngù ndù bag ywèt kondèn o njoṅ nkebnjù fa. Ndùlala mba bag nsi be ntùm tsiaṅte mba ṅwate mum njoṅ yôg sag fa.

¹⁵ Fà lé'njù tsiaṅte bag à be njoṅ z'o na' mfà lé'njù laṅte bag là. Mfà ngu'njù bag be njoṅ ze bag ghù ntùm nge' là.

¹⁶ A bwô ndù fa' so tswite wul i num ghafa' tsho, ghamt'o tswite wul i num bon tsho!

¹⁷ A bwô ndù nkondèn Tshùaben, Nsi yag be num bag. Tomte fa' mbu mage. Ṅ, tomte fa' mbu mage.