Yobkwi 9 - NTSHOB NSI

Tshùaben, njôg bwoṅ mba njennge'

¹ Ntshagte yobkwi. Num mfi'. Yobkwi David.

² Tshùaben, me nsi ke ghamt'o njoṅ ntù àm fa, me nsi ke soṅ njoṅ mfa' nkuni mu fa.

³ Me nsi ke ṅwate bèn ke tsiaṅte num o. Me nsi ke yob lén so, wù Tshùaben z'o be tà mfe tù là.

⁴ Ghakeban tshàm bèn mbèn njam, ngwùte nsi, mbite num miag mu.

⁵ O be ntshètte njam àm mbèn nke ntomt'àm, ntswe num ko'fen mba ngatsho'te ntsha ze netsin nà.

⁶ O yab mbu num ghakelèn Nsi, mbiagte ghatshùagntù, o bwete lén sob yoṅ ntshù';

⁷ ze nu ngakeban mi, nebagte ts'a tswe matmat là, ngô ts'o bagte là, nekwimte yub ke' bèn mbe.

⁸ Tshùaben tswe matmat, a te ko'fen se num nu tsho'te ntsha.

⁹ A lo' nunetsin ntsho'te njù yi, a keb ntsha ngôngô ntùm nu ndaṅndaṅ.

¹⁰ Tshùaben, a bwô ndù o be neta dù' z'a be njennge' lem bwe là, neta dù' z'a be mèn lem bwe ngelaṅ ngùtni là.

¹¹ Ben tse bo lèn lén so là be njab ntù num o, o ke' ghua' ben tse bo be ndiag o là.

¹² Yob kwi mfà Tshùaben z'a be ntswe Sion nà, soṅ mbwô mbwô tshu ts'a be ngù là netèt ngôngô.

¹³ Yi z'a be njagte mba' lem nà, be nkwimte yube, a ke' be lagte nkua' ghayennge'.

¹⁴ Tshùaben, ko ndèn màm, tam lag so num nge' àm, sô àm ntshu vù,

¹⁵ ndùlala ndù me soṅ njoṅ nkuni mu fa nsém Sion, mbèn ntsiaṅte num yôg s'a fe wù là.

¹⁶ Ghakeban Nsi vù ntùm tô se bo tswe' là, nku mub tsho ntùm nkù ze bo bùn nà.

¹⁷ Tshùaben la'te wul i, Tshùaben keb ntsha; mfa' mbu tshùagkèt mèn ma' i tàme.

¹⁸ A bwô ndù ghatshùagntù bèn njam ntùm ngô fe ben, njoṅ tshen ghakelèn Nsi là tse bo be ndagte Nsi là.

¹⁹ Nummbe Nsi ke nsi lagte mbwoṅ tà nèn miagte, ze nenywinte ghayennge' ke nsi bi yoṅ ntshù'.

²⁰ Tshùaben, tsin tù, ndù kà mènntùn tshùa ntsho, a bwô ndù bo tsho'te ghakelèn Nsi mbwe o.

²¹ Tshùaben, ma' fétwut num bo, ndù ghakelèn Nsi lèn ndù bo b'a benntùn.