Yobkwi 86 - NTSHOB NSI

Ntùm nge' àm, me tsiaṅ o

¹ Le'te David. Kù' toṅ nju' àm, mbùnte me! Nummbe me b'a ngayennge' mbe mbwoṅ.

² Lem ntù àm, nummbe me b'a nshun o! Nsi àm, yôg ngafa' o z'a be njab ntù i num o là!

³ Tshùaben ko ndèn màm. Nummbe me be nkua' wù njoṅ lé'njù fa.

⁴ Ghù ndù ntù ngafa' o tsiaṅte. Nummbe ntù àm ke ndo nsi, nse' à mbaṅ o me Tshùaben.

⁵ Nummb'o b'a mèn mebwô me Tshùaben, o be ndagte. O dun nkôni num ben tse bo be ntsiaṅ lén so là.

⁶ Tshùaben, kù' toṅ num yàm le'te, ju' nze njoṅ tshàm nema' mbu fa.

⁷ Me be ntsiaṅ lén so mum lé'njù nge' sàm. nummb'o be nju' àm.

⁸ Sàm nsi ke bwe z'a be ndaṅndaṅ mba wù là me Tshùaben. Sàm ju ke bwe z'a fute mfa' mu là.

⁹ Njoṅ ngôngô fa ts'o na' nabte là nsi se'e; vù nsi mbwe o me Tshùaben. Bo nsi fà ghamte num lén so.

¹⁰ Nummb'o b'a mèn ndùb, nke ngù tshu netshàme; nda' tu wul o tù' o bèn mbe Nsi.

¹¹ O Tshùaben, tswit'àm tsho manze. Me nsi zin mum yu nenùne. Tsiagte ntù àm a ke mbwôg lén so.

¹² Tshùaben Nsi àm, me nsi ke nyàmt'o njoṅ ntù àm fa! ke ghamte lén so matmat.

¹³ Nummbe kondèn o b'a ze ndùb num àm. O be ntshu' ntù àm tà mà njam ngô fe ben.

¹⁴ O Nsi, ghako'te wut lo nsi num àm. Mo' bwoṅ ghafètte lem tshwèt nkô nebiagte yôg sàm. Bo ke' yab nkwatenu mub num o.

¹⁵ Là, wù Tshùaben, o b'a Nsi kondèn mba Nsi tshàmndèn, ndù o be ndèt wut num yantù, mbe ngafu' ntùm bwôntù nenùne.

¹⁶ Kaṅ wul o ntam lag so num àm, nko ndèn màm. Fà neta ngafa' o, njôg mén ngafa' o ze mènnzwi!

¹⁷ Ghù ta' nsà num yàm tu! Ndù ghakeban tshàm yen tuswe ko yube. Nummb'o be njwimt'àm, mbèn nke ntag àm, me Tshùaben!