Yobkwi 78 - NTSHOB NSI

Mfa' Israél mi a tôg là b'a nukelag

¹ Yobkwi Asaf. Yàm nzwit mèn ju' ntag màm. Bin kù' ntoṅ nju' ntshob mi a tum ntshu àm nà.

² Me be nga' ntshu àm, ntshob tànkùt. Me be ntshob mesin ts'a be ngelaṅ mbwe là.

³ Ju ze bag na' nju' là, ju ze bag lèn nà. Ju ze tà tshag na' nsoṅ yag là.

⁴ Bag ke nsi lemte bon tshob yi. Bag nsi tshob ghamte Tshùaben zwiaṅ benntùn tse bo nsi se' là. Tshob nu num neta i mba mfa' nekuni mi a fa' là.

⁵ A lo yab kwénta num Yakob. A lo yab ntshù' num Israél. Ntshob ba tà be ndù bo ke nkwimte bon tshob yi.

⁶ Ndù zwiaṅ benntùn tse bo nsi se' là lèn yen ntshù' là, mba bon tse bo nsi bwe yub là. Ndùlala ndù bo lo nsi ntshob yen nu là tshob bon.

⁷ Ndùlala ndù bo yab ntù yub num Nsi. ke lagte mfa' Nsi. Ndùlala ndù bo ze ntshù' mi.

⁸ Ke be mba tà tshobe, nzwit ke ju' ntshu mba ghatatu, nzwit ben tse ntù tshob na' mbe ke tàn, nzwit ben tse ntù tshob na' mbe ke be nenùn num Nsi là.

⁹ Bon Efraim tse bo tshùb tshuntshùag, nke ma' nkét là, lo kaṅ mvèn yub mum lé'njù ntsho.

¹⁰ Bo lo ke tshùb kàn Nsi. Nga nezin ndaṅndaṅ mba ntshù' i kô là.

¹¹ Bo lo lagte mfa' mi fa. Ndagte mfa' nekuni mi a na' ntswite bo là.

¹² A lo fa' mfa' nekuni mbwe tà tshobe. Ntùm ngô Egipto mba mà tshwèt Tsoar.

¹³ A lo keb dibantse, nga' manze bo bwe. Ntse tsin mba kàb ndùb là.

¹⁴ A nke ndo' ndot ntshagte yub yi mbwôgtshù. Ndo' mbwôg z'a tshwèt nké' là ntshagte yub yi tèttswe'.

¹⁵ A bag ngondoṅ kônkwa, mfà ntse bo mi nenu, a nke nswe' mba koṅntse ndùb là.

¹⁶ A lo ghù ba tumnsi ntse tum num gholoṅ, nke nswe' ntse mba nta'ntse là.

¹⁷ Là, bo nke ngù be nukebwô yi nèn mbwe. Bo ta tu Nsi z'a be tà mfe tù là num kônkwa.

¹⁸ Bo laṅte Nsi ntùm ntù tshobe. Mbètte jujù mba ntù tshob kô là.

¹⁹ Bo tshob nu mban Nsi yi, ntshob ndù: Be Nsi te téblé num kônkwa ké?

²⁰ Tshù, a lo lab gholoṅ, ntse tum, nkoṅntse sa; be a fà mba bàn mbèn mfà mbàb ze nzwit mèn ké?

²¹ Ndùlala Tshùaben ju' nja ntù. Mo' mbwôg kù num Yakob. Yantù lo nsi num Israél.

²² Nummbe bo lo ke bam Nsi. Nummbe bo lo ke yab ntù num ze ywimte.

²³ Mba ndùlala, a tshob nu ndot mi a mfe tù là, mbèn nga' nzendà kamànyam.

²⁴ A ghù mànà swe' mfe tù ngwù netèt bo num jujù yube. A fà nsa mfe kamànyam bo.

²⁵ Njoṅ yub fa jù bàn ben ndùbndùb. A tum jujù bo njoṅ z'a ku' num bo là.

²⁶ A ghù lèn fetmbaṅ z'a fe bag ntumnyam nà tshu' mfe kamànyam; a lo' neta i ndo' fetmbaṅ z'a fe mà ntèn nà yi.

²⁷ A ghù mbàb vù netèt bo mba mbab là, ngù nsaṅ mi mbàb mi be bwe là vù netèt bo mba nkwango' mi a ntùm ba dibantse là.

²⁸ A ghù tshen tshu là vùte netèt fèn bo, ndiaṅ ndà tshob mbume.

²⁹ Bo jù njwèt kua' mebwô. Nsi fà ju ze bo kô là bo.

³⁰ A lo ke ghù ju ze bo kô là kà miagte. Jujù yub lo ke' ntshu bo.

³¹ Ndùse yantù Nsi kam num bo là; Nsi zwite ben tse ngù' be num bo yàm nà, mbiagte bonnshum netèt Israél.

³² Mba ndùlala bo nke ngù nukebwô nèn be mbwe, ke bam mfa' mi mi nekuni.

³³ Bo ghù njoṅ lé'njù tshob fa tôg à ntùm ko'tewut. Ngu'njù tshob bèn mi a kua' ndende.

³⁴ Ngelaṅ z'a ke nzwite yub là, bo to' neke ndiag i. Bo nke mbèn njam, nkaṅ wut yub nèn mbaṅ Nsi.

³⁵ Bo kwimte ndù Nsi b'a sob gholoṅ. Ndù Nsi z'a be tà mfe tù là b'a ngatshu' yube.

³⁶ Là, bo nke mfùt'é num ntshu bo, nke ntatt'é num lém sobe.

³⁷ Ntù yub lo ke tàn num i. Bo ke be ben nenùn num kàn se.

³⁸ Mba ndùlala, a nke ndagte nukebwô yub mum kondèn i njoṅ ndù fa, ke bagte yube. A nke ntshùb yantù i ngelaṅ yàme, ke lo' njoṅ tshùagntù i fa nèn yi mbwe.

³⁹ A kwimte ndù bo b'a nda' benntùn, zwiag s'a be ntum nène, ke bèn mbèn njam nà.

⁴⁰ Mi' bo lo ke nta tu yi ngelaṅ yàm num kônkwa à? Mi' bo lo ke ngù a nja ntù ngelaṅ yàm ndùs'a be tù' i l'à?

⁴¹ Bo ke tsin nelaṅte Nsi. Mba neke nkamte Israél Nsi Israél z'a be Nelàn nà.

⁴² Bo ke kwimte neta i, ke kwimte lé'njù s'a tshu' yub bu ngakeban nà.

⁴³ Ke kwimte ba nsà ts'a ghù mà Egipto, mba mfa' mi mi nekuni mà tshwèt Tsoar.

⁴⁴ A lo ghù nta'ntse mub tù' lem. Bo ke bèn ngù nenu ntse mi a tum bwe là.

⁴⁵ A lo tum nzenze tse bo ghù njoṅ nà, bo tshôg yub fa, mba ba metu' bo sate yub fa.

⁴⁶ A fà tshu tse bo dù' là ngamntàn, mfà ju z'a tum mum mfa' mub là ngamntàn.

⁴⁷ A lo ghù nywinmbaṅ bagte nkùa yube, ngù mfùag bagte mfènngab mube.

⁴⁸ A lo ghù keya' bagte nyàm tshobe, ngù beba'mbaṅ bagte bwoṅ yàm tshobe.

⁴⁹ A ma' tonkèt yantù i num bo, tshùagntù, mbagte mba nge'. Nkag mo' bwoṅ ghantum nge' num bo.

⁵⁰ A fà manze yantù i. Ke yôg ntù yub bu vù. A fà yôg sob keya';

⁵¹ a zwite njoṅ tuswe bon ba Egipto fa. Tshen mbwe bon nà tse bo b'a mbwe bon ts'a tum ntùm ba ntàb Kam nà.

⁵² A lo ghù ben tse nèn mba njùmbwe là. A lo tshagte yub mba bwoṅ nyàm nà num kônkwa.

⁵³ A lo tshagte yub kua' mebwô, ndùlala ndù kà bo be ntùm bwôg, dibantse lo kabte ghakeban tshobe.

⁵⁴ A lo lo' yub nèn yi num ndùnsi i ze nelàne, num yen mbat là ze bu i ze zwim na' nkwé là.

⁵⁵ A lo ta' ntumntum mbwe bo, ngabte ngô bo mba ntsi' là. Ngù nzwit Israél tswe ntùm ntàb tshobe.

⁵⁶ Là bo laṅte Nsi z'a be mfe tù là, ke ze ntshù' mi.

⁵⁷ Bo nèn ngùanesà mbaṅ i, ngù be mba tà tshob là, ke be ben nenùne. Bo kaṅ mba ngoṅkét fùte là.

⁵⁸ Bo ghù ntù i ya num dù' ghamte nsi tshobe, nkamte ghe't'é njam nsi neto tshobe.

⁵⁹ Nsi ju' ndùlala nja ntù, ngua' Israél yoṅ ntshù'.

⁶⁰ A ghua' dù'ntswe z'a mà Silo là, ntàb dù' z'a ke ntswe bwe netèt benntùn nà.

⁶¹ A fà ngù' i ndà kuan. Mfà nkuni mi ntùm mbu ngakeban.

⁶² A lo fà ze nzwit mèn num ntshùag ṅwi. Nja ntù num ntsi' mi.

⁶³ Mbwôg kù bonnshum kà bonngon ke yob kwi nandà.

⁶⁴ Tse ghale'te Nsi kwù vù ṅwi, bon fôg tse ke ku'ni nelàn ba mfe.

⁶⁵ Ndùlala Tshùaben bam, mba mènntùn z'a lo num miaglo, mba ngama' ntsho ze ndu' ghù a nke ṅwate là.

⁶⁶ A tam bu mvèn ghakeban tse. Nso tuswe matmat tu bo.

⁶⁷ Mba ndùlala, a ghua' ntàb Yosèf, ke netsho' tse nzwit Efraim.

⁶⁸ A lo te lag à num nzwit Yuda. Mbat Sion z'a ke nkô là.

⁶⁹ A kut ndà i ze nelàn dù' ts'a ṅate tù là. Mba tsha' z'a na' njab matmat là.

⁷⁰ A tsho' David ngafa' i, nsô i ntùm nkin mbwe;

⁷¹ a lo' i njam njùmbwe tse bon ke nyô yub là. Num neghù ndù a ke ntshagte Yakob; ze nzwit mèn, mba Israél z'a be ntsi' mi là.

⁷² David lo tshagte yub ntùm ntù nelàne. Ndo' bu zenu ntshagte yub yi.