Yobkwi 77 - NTSHOB NSI

Ntùm nge', me tsiaṅ o num numebwô

¹ Ntshagte yobkwi, num ze mat Yétudun. Yobkwi Asaf.

² Me be ntshag nz'àm tù, nkua' ntsiaṅ Nsi. Me be ntshag nz'àm tù. Nsi a' ju' me.

³ Me be ndiag Tshùaben mum lé'njù nge' sàm. Me be nyit mbu màm tèttswe' ke bot; ntù àm ke tshwèt nkô sàm fitentù.

⁴ Me be nkwimte Nsi, nke nzwiage; me be nsiaṅte, ywèt tshàm yub.

⁵ O be nga' nkub miag màm nte nge, me ke bèn nku'ni netshob nu num yàm femni.

⁶ Me num nkwate lé'njù ts'a be mbwe là. nke nkwate ngu'njù ts'a be mbwe là.

⁷ Me num nkwate njobkwi màm tèttswe'; ngù nkwate mà ntùm ntù àm, ywèt tshàm siaṅte nu.

⁸ Tshùaben tù' ghua' be à yoṅ ntshù' ké? A ke' bèn mbam neko ndèn ké?

⁹ Ndù kondèn Nsi mi tse matmat ké? Ndù ntshob mi mi tse matmat ké?

¹⁰ Nsi lagte tse neko ndèn ké? Nsi tshob ntùm tshùagntù i ndù kondèn ke bèn nebe ké?

¹¹ Ndùlala me tshob tu wul àm ndù: Tshù ju z'a ghù k'o nke njen nge' là. A b'a nummbe Nsi z'a be tà mfe tù là, bu i ze zwim bate!

¹² Me be nkwimte mfa' Tshùaben, nummbe me be nkwimte mfa' mu mi nekuni mi a na' mbe mbwe là.

¹³ Me nsi tshob njoṅ mfa' mu fa, me nsi soṅ tshu ndùbndùb ts'o ghù là,

¹⁴ O Nsi, manze tsho làn! A zit nsi z'a be ze ndùb mba Nsi yag à?

¹⁵ O b'a Nsi z'a fa' mfa' nekuni là. O lo ghù neta o tum netèt benntùn.

¹⁶ O lo tshùa njam bu o, ntshu' yu nzwit mèn, bon Yakob mba tse Yosèf.

¹⁷ O Nsi, ba ntse lo yen o, ba ntse lo yen o, bo lo vètte; mba ngem lo vètte.

¹⁸ Ba ndot sa ntse mube; ba ndot sa mfambaṅ, bo nke ma' nkét mu njoṅ bag bag fa.

¹⁹ Fambaṅ nke ntsham ntùm zim, mbeba'mbaṅ nke nké' njoṅ njù fa. Tsha' vètte, nyi'te.

²⁰ O lo nabte manze ntùm dibantse, nabte ntshagnze ntùm ntse ndùbndùb. Kà mèn ke ghù nelèn ntshùa mu.

²¹ O lo tshagte yu nzwit mèn mba bwoṅ nyàm nà, ntshùa njam bu Mosé mba Aron.