Yobkwi 75 - NTSHOB NSI

Nda' Nsi bèn nke nsa' ntsha

¹ Ntshagte yobkwi. Kà sate. Yobkwi Asaf.

² O Nsi, bag be ngamt'o, bag be ngamt'o. Lén so b'a ntùm ntshu yage; bag nsi soṅ mfa' mu mi nekuni.

³ Nsi tshob ndù: “Kua' num ngelaṅ me nsi yab là, me nsi tsho'te ntsha ndaṅndaṅ.

⁴ Tsha' tshwèt nyi'te boa ben bo be num bwe là. Tu wul àm, me féb ntom tse nsi.”

⁵ Me lo tshob ben tse bo be ngamte wut tshob là ndù: Kà bin neghamte wut tsine! Ntshob ghatshùagntù ndù: Kà bin bù' tu zin nsi!

⁶ Kà bin bù' tu zin tù. Kà bin nelo' ka'te ntshob yi ndùlala!

⁷ Nummb'a ke b'a bag ntumnyam, bag mbinyam ke kônkwa lo ze ṅate be mfe bwe là.

⁸ Là Nsi b'a ngatsho'te ntsha. A be ma' mo' mèn nsi, mbù' mo' mèn tù.

⁹ Mo' ntu' num bu Tshùaben, dù' ze tamte nsam ndu' be là. A be nke nsô, ghatshùagntù tse bo be num tsha' là nke mfine, nke nu, nu tà nkum num tun i.

¹⁰ Me nsi soṅ tshen tshu là njoṅ ndù fa; me nsi yob kwi ghù nku'ni yi Nsi Yakob.

¹¹ Me nsi lab njoṅ ze neta ghatshùagntù fa. Me nsi bù'te njoṅ ze neta mèn netsin fa.