Yobkwi 74 - NTSHOB NSI

Bo tsiaṅ Nsi ngelaṅ ndà i vù nsi là

¹ Yobkwi Asaf. O! Nsi, numk'o ngua' i yoṅ ntshù' à? Numk'o nja ntù num bwoṅ nyàm z'a be mfèt ntùm so kin n'à?

² Kwimte ben tsho ts'o na' ntshu' yub ngelaṅ mbwe là, ts'o na' ntshu' yub nelo' ngù yu ngô yi là. Kwimte yen mbat Sion là z'o te dù'ntswe o bwe là.

³ Kù' nèn nze tshen dù' là tse bo na' nsate yub matmat là. Ngakeban sate njoṅ i fa ntùm ndà o ze nelàne.

⁴ Ghamaṅt'o tshwèt ntshu' netèt dù' mbumte tsho; bo te tshob lén bwe, ndo' nda'te ntshùa mub yi.

⁵ Bo be njen yub bo fute ben tse bo ka' njàm tù, ntùm fèn s'a tam njam nà.

⁶ Bo à be'te njoṅ tshu nekwi ndà yi fa, ndo' à njàm bo ndun lam mbe'te njoṅ i fa yi.

⁷ Bo te mbwôg num ndà o ze nelàne. Bo bagte dù'ntswe lén so.

⁸ Bo tshob ntù bo ndù: Be sate njoṅ i fa ngelaṅ ntshù'. Bo ton njoṅ dù' nelàn fa ntùm ngô.

⁹ Bag ke' bèn neyen tshag tshag lén. Ghatshob ntshob Nsi ke' bèn nebe. Sàm mèn netèt bag ke' lèn ngelaṅ ze yen nu là nsi mi là.

¹⁰ O Nsi, ngaghùtni nsi tshabte, ngakeban wag lén so ke tsin tà nèn kum à ngelaṅ ndùke?

¹¹ Numk'o mbèn bu o njam, bu o ze zwim à?

¹² Nsi b'a yàm mfen fe tà ngelaṅ mbwe, yi z'a be nke ntshu' ben tse num nsitsha' là.

¹³ Ṅ, a b'a wù na' mbèn ntshùa njam ngù' o mfagte dibantse, wù z'o na' ntsit tu nyàm ndùbndùb ntse là.

¹⁴ A b'a wù na' ntsit tu dingwa, mfà yub ba tswemànko' mba jujù yub là.

¹⁵ O lo ghù ba tumnsi ntse bèt nsi mba ba ntsit mbaṅ nà. O lo ghù nta'ntse mi a ke' be jum nà jum.

¹⁶ O bèn ngù mbwôgtshù mba tèttswe'. O lo nabte maṅwù mba lagnyam.

¹⁷ O lo yab ba ndù njoṅ tsha' fa. O lo ghù dum, ngù sàne.

¹⁸ Kwimte ndù ngakeban be ntshabte Tshùaben, mba ndù nzwit kagni be ngwag lén so!

¹⁹ Kà fà mèn z'a be ngamt'o là ba nyàm. kà lagte yôg tsho ghayennge'.

²⁰ Te lag num kàn so! Nummbe ba fimntshu gha' mbu ntùm dù' njam ts'a mum ngô là.

²¹ A ke' bwô ndù mèn bo ghùtni là lo' tuswe mfe yi. A bwô ndù ngayennge' mba mbwoṅ ghamte lén so!

²² O Nsi, lo nsi ntshètte yu njam! Kwimte tshabte ze nkagni be ntshabt'o yi njoṅ lé'njù fa là.

²³ Kà lagte tshu'te ghamaṅt'o, ke lagte tshu'te ze ben tse bo lo nsi num o be ntshu'te ke tsin njoṅ ndù fa, a nke nèn be mbwe là.