Yobkwi 73 - NTSHOB NSI

MBATTE ṄWA'NI TAT ( Yobk. 73—89 ) Ngelaṅ a tswe mba mfa' tshùagkèt benntùn zin nà

¹ Yobkwi Asaf. Ṅ, Nsi ghù bwôntù num Israél, num ben tse bo ghù ntù nelàn nà.

² Là, tu wul àm me lo ke nkwù kotte ku àm. Nku màm lo ke ntù' netiage.

³ Nummbe me lo ke ngù ghe'te num kagni, ngelaṅ me yen ghatshùagntù be ntùm fu' là.

⁴ Mo' ju ke' be ghùtni yub kà nkum sob lé'njù vù. Wut yub dun ntswe mebwô.

⁵ Bo ke' lèn tshob sàm ju num tse nge' ben nyiaṅtu. Nu ke' to' tsho yub tshob mba tsemo' tshé' benntùn nà.

⁶ A ndùlala ko'te wut b'a mub ntshèn, nefètte lem be nzwe z'a be nkabte yub là.

⁷ Nukebwô be ntum ntùm ntù tshobe. Nkwatenu ntù tshob tum njù.

⁸ Bo be nzwi, nke ntshob ntshob kebwô kua' kebwô. Bo be ntshob ntshob ko'te wut.

⁹ Bo be mbù' ntshu yub t'a zin nkum mfe kamànyam, lém sob be nzinte num nsitsha'a.

¹⁰ Tshù ju z'a ghù ben tshàm b'a yub bag là. Fu' yàm be mbe bo.

¹¹ Bo be ntshob ndù: Nsi a' lèn à ndùke? Nsi z'a be tà mfe tù là lèn ké?

¹² Tshù mba ghatshùagntù be mbe là, bo b'a ghafen njoṅ ndù fa, mfu' mub be nke nèn mbwe.

¹³ A banban mba me lànte ntù àm nà, a banban mba me sôg mbu màm ntùm mbu' là.

¹⁴ Me ke mb'a be nelab njoṅ lé'njù fa. Yàm nevù ntsha ke be tag njoṅ nkebnjù fa.

¹⁵ Me lo tshob ndù: M'a' tshob yàm mba bo là, tshù, mba me nsi ghù ndàm num nzwit bon tsho.

¹⁶ Ngelaṅ me kwate, ndiag nelèn yen mesin nà, yen nu là lèt num miag màm neshu.

¹⁷ Tà nkum ngelaṅ me na' ntsho ntùm Ndà Nsi, ndà nelàne, kà njen ju z'a nsi be miagte tum num ghatshùagntù là.

¹⁸ Ṅ, o be nte yub num manze tse netiage. O be ngù bo vù nsi mbèn ngù bo tù' ju banban.

¹⁹ Tshù mba bo sate yub num metsit ngelaṅ njene! Tshù, bo lo' yube, mbiagte yube kua' ndende!

²⁰ Bo bit'a mba njem nkebnjù, ze mèn be mbe bam num miaglo njoṅ ndagte ntshùa mi là.

²¹ Ngelaṅ zwentù na' ndun ntùm ntù àm, me nke nzwiaṅte kua' yàm tu wut là,

²² me lo ke ghù lèn nkwate mba lèn zenu yen ngelaṅ nà; me lo be num miag mu à mba femni nyàm nà.

²³ Tu wul àm ze me ke ntsin mbwe o là, o lo tshùb àm bu àm ze zwim.

²⁴ O nsi tshùa njam ntag mu tshagt'àm; o nsi bèn lo' àm ntùm ghamte.

²⁵ We ze be me ghù mfe kamànyam k'a ke nda' wù à? Me ke' kô sàm ju num nsitsha'a, k'a ke nda' wù.

²⁶ A be ze tu wul àm mba ntù àm bagte là, mba Nsi b'a gholoṅ ntù àm mba yàm bag i njoṅ ndù fa.

²⁷ Ṅ, ben tse bo be nèn ngùanesà mbaṅ o là nsi bi. O be mbiagte ben tse bo lo njam o là.

²⁸ Mba yàm tu wut là, neghebte mbaṅ o nsi b'a fu' me; me be njab ntù àm num Tshùaben Nsi, ndùlala ndù me soṅ njoṅ mfa' mi fa.