Yobkwi 71 - NTSHOB NSI

Ndonni me ywèn nà, kà faṅ àm

¹ Tshùaben, me ke ndiag yàm ndàlem à num o. A ke' bwô ndù tuswe zi nko àm.

² A bwô ndù o yôg àm mbèn ntshu' àm ntùm yu nunetsine. Ben toṅ o nze mbaṅ àm, njwimt'àm.

³ Be gholoṅ se be me tshètte wul àm bwe là, dù' ze be me nke ntum ntsin bwe njoṅ ndù là! O lo tshob ndù o a' yôg àm. Nummb'o b'a sàm gholoṅ mba yàm ndàlem.

⁴ Nsi àm, tshu' àm bu nukebwô, bu mèn kebwô mba ngafètte lem.

⁵ Nummbe me ke nywint'a num o. Tshùaben Nsi! Me yab ntù àm num o fe num tshàm lé'njù nshum.

⁶ Me ke njé't'a num o fe tà bam màa. A wù bèn ngù kà me tum bam màa. Me be nyàmt'o njoṅ ndù fa ke tsin.

⁷ Me tù' à mba ju zwi là benntùn yàme. Tu wul o, o b'a yàm neta ndàlem.

⁸ Ntshu àm be ndun ghamte Tshùaben. Me nsi ke ghamt'é njoṅ lé'njù fa.

⁹ Tshùaben kà ghua' àm ngelaṅ me ywèn nà. Kà ghua' àm ngelaṅ yàm neta kôgte là.

¹⁰ Nummbe ghakeban tshàm be ntshob nu num àm, ben tse bo be nya' yôg sàm nà tsin tsham netèt bo.

¹¹ Ntshob ndù: Nsi ghua' i. Bin yoṅ i, bin tshùb i, mèn ke bwe z'a tshu' i là.

¹² O Nsi, kà nèn ngùanesà mbaṅ àm. Nsi àm, nànte nse' njwimt'àm.

¹³ A bwô ndù tuswe ko yube, a bwô ndù bo biagte ben tse bo be nkô nezwi àm nà. A bwô ndù tuswe kabte ben tse bo be ndiag ndù me bi là.

¹⁴ Mba me là, me nsi nywinte njoṅ ndù fa, me nsi ke nyàmt'é yàm yàme.

¹⁵ Ntshu àm nsi soṅ nunetsin o mba yôg so njoṅ lé'njù fa. Nummbe me ke' lèn dù' ze ndù tshob zin nkum nà.

¹⁶ Tshùaben Nsi, me nsi tshob mfa' mu mi neta. Me nsi kwimte yu nunetsine, nda' yu nunetsine.

¹⁷ O Nsi, o lo tagt'àm fe mum lé'njù nshum tshàm. Tà nse' nkum ndonni me be nsoṅ mfa' mu mi nekuni.

¹⁸ O Nsi, kà ghua' àm! Mba ngelaṅ me nsi ywèn kom fôg là, ndùlala ndù me soṅ neta o yen zwiaṅ benntùn ni, nsoṅ ngù' o zwiaṅ benntùn z'a nsi se' là.

¹⁹ O Nsi, nunetsin o be nèn tà nkum mfe kamànyam. O lo ghù tshu ndùbndùb bumte. O Nsi, we z'a be ndaṅndaṅ mba wù à?

²⁰ O laṅte yag mum nge' mba ngùtni yàme. Là, o nsi bèn fà yôg bag. O nsi ghù bag tum ntùm ngem mi a mum tsha' là.

²¹ Ko'te ghamt'àm ze ndùb mfà tù mbèn mfite ntù àm fite nswe.

²² Me nsi nyàmt'o num nze loṅe. Nsi àm, me nsi yob kwi num yu nenùne. Me nsi ghamt'o num loṅe, me Nelàn Israél!

²³ Me nsi be ghamt'o ghù tsiaṅte num nkub ntshu màm, tsiaṅte be ntùm ntù àm z'o na' ntshu' i là.

²⁴ Lém sàm nsi ke tshob yu nunetsin njoṅ lé'njù fa. Nummbe tuswe ko ben tse bo be ndiag ndù me bi là.