Yobkwi 7 - NTSHOB NSI

Tshùaben, tsho't'àm nenùne

¹ Nsindàvù ze David yob Tshùaben num Kush mèn Benjamin là.

² Tshùaben Nsi àm, o bèn mbe yàm ndàlem, kwé àm bu ben bo tshwèt ntsho' nku màm kebàn nà, tshu' àm.

³ Ndù k'a fagt'àm mba ngwayit z'a be ngome, mèn ke ku'ni nekwé yi là.

⁴ Tshùaben Nsi àm, a be ze me ghù ndùlala, mfaṅ nukebwô mum mbu màm,

⁵ a be ze me yagte mba' ngankô àm, ndagte tshu mèn z'a ke ngùtni àm ke ntun mi là,

⁶ a bwô ndù ngakeban bwe àm tà ngom àm, mfét yôg sàm num tsha'a, mbiagte yôg sàm; ntshoṅ ghamt'àm ntùm mbabe.

⁷ Tshùaben! Lo tù ntùm yantù o. Lo tù num tshùagntù ghama'ni àm. Bam num miaglo njwimt'àm, ngù netsho'te ntsha be!

⁸ Ke mbumte ngôngô lam o mbum no, o bèn ndo nsi num i.

⁹ Wù Tshùaben ngatsho'te ntsha ngôngô. Tshùaben! Tshùa njam yàm nunetsin mba yàm nebe mbu'u ntsho'te ntsha àm.

¹⁰ Ghù ndù nukebwô ghaghù kebwô mi, fà tànntù ntù mèn netsine, wù Nsi netsin z'o be ndiag ntun num ba ntù boa ba zwe' là.

¹¹ Nsi b'a tshètntsho z'a be ntshètt'àm nà, a b'a ngayôg ben tse ntù tshob tsin nà.

¹² Nsi ngatsho'te ntsha ze netsine, b'a Nsi z'a be naṅ ntsha num benntùn njoṅ lé'njù fa là.

¹³ A be ze tshùagkèt mèn ke' kaṅ ntù i là, mba Nsi a' kùa ṅwi i, nabte nkét mi, nto' nelaṅe,

¹⁴ a ghù tshuntshùag vù, ngù nkét.

¹⁵ Tshù, tshùagkèt mèn be ndét nkwate nuketsin, njùm nukebwô, mbwe ju banban.

¹⁶ A be ntsho' ntshu tô, ntswe'e, mbèn ngwù ntùm tô se tu wul i tswe' là.

¹⁷ Mi mfànnu ke ngwù à be tu i, ze netshùag bèn ntsin à be num se i.

¹⁸ Me nsi nyàmte Tshùaben num ze nunetsine, me nsi ke njob lén Tshùaben, z'a be tà mfe tù là!