Yobkwi 66 - NTSHOB NSI

Ghamte be Nsi ngayôg be

¹ Ntshagte yobkwi. Yobkwi. Bin fà nze zin tù, ngamte Nsi. Bin njoṅ benntùn fa tse bin be ntswe num nsitsha' là.

² Bin yob kwi ngamte lén se yi. Bin ghamte nkuni mi ntùm zin nenyàmt'é.

³ Bin tshob Nsi ndù: Mi' mfa' mu be nkuni neshu! A tshùa num neta o ze ndùb, ghakeban tsho nke mbatt'o.

⁴ Njoṅ njù fa be ngwù nsi mbwe o, nke njob kwi ngamt'o yi. Nke njob kwi ngamte lén so yi.

⁵ Bin se' nze mfa' Nsi! A be nkuni neshu ngelaṅ z'a tshwèt ngù nu num bon mèn nyiaṅtu là.

⁶ A lo lo' dibantse ngù tsha' njum yi. Bo lo dut ta'ntse nku. Ndùlala bag lo tsiaṅte num i.

⁷ A be ntshùa njam ngù' i ntô njù matmat. Miag mi be nte num ngôngô. A ke bwô ndù ghatatu bù' tu yub nsi.

⁸ Ba tum, bin ghamte Nsi yag, bin tshag nze zin tù ndo' nyàmt'é yi.

⁹ A lo lem yôg ntù be. A lo ke bam ndù ku be tiage.

¹⁰ Kua' nenùne, Nsi lo laṅte be. A lo ghù be tshùa ntùm mbwôg ndàn mba tùn nkàb là.

¹¹ A lo lo' be ntsho yi ntùm nkù, njab ju z'a lèt neshu là num be.

¹² A lo ghù benntùn vù num tu be. Be lo tshùa ntùm mbwôg mba ntùm ntse. Là, a lo sô be bwe num neghù be tswe ze be tu.

¹³ Me nsi lo' tshu neton nèn yi ntùm ndà o; me nsi ghù ndù nka'ni mi me ka' wù là bumte.

¹⁴ Nka'ni mi nkub ntshu màm tshobe, ntshu àm tshob ngelaṅ me be ntùm nge' là.

¹⁵ Me nsi ton njùmbwe ts'a ghù nzit là wù, boa nzit nkomnjù, me nsi fà njùmbwe boa mfot mbwe mba jule'te Nsi là.

¹⁶ Njoṅ zin fa bin be mbwôg Nsi là, bin se' nju'u, me nsi soṅ zin ju z'a ghù ntù àm nà.

¹⁷ Me lo kua'a, ntsiaṅ i ntshu àm, ghamt'é yoṅ mbe tun lém sàm.

¹⁸ A lo mbe ndù me lo kwate nukebwô ntùm ntù àm, mba Tshùaben lo ke ju' le't'àm.

¹⁹ Là, Nsi lo ju' le't'àm, a lo kù' ntoṅ num yàm ma'mbu.

²⁰ Ghamte be Nsi, z'a ke' gha yàm le'te, ke bèn nsô kondèn i num àm nà.