Yobkwi 65 - NTSHOB NSI

Nsi! O ku'ni mba be bo ghamt'o là

¹ Ntshagte yobkwi. Se David. Yobkwi.

² O Nsi, ghamte b'a yu mà Sion. Bo ke ngù nka'ni mbumt'a num lén so.

³ Wù z'o be nju' le'te là, njoṅ benntùn fa nsi se' tèl o.

⁴ Nukebwô fam àm. O nsi lagte mfànnu màm.

⁵ Mènfen b'a mèn z'o tsho' i, mbam ndù a se' mbwe o, ntswe bam ntshundà tsho là! Bag nsi jù ywèt mum fu' z'a be ndà o, mum ndà o z'a be ze nelàn nà.

⁶ Nsi ngayôg yag, o be ntshùa num yu nunetsin nda'te ndù o ju' le'te yag njam tshu nekuni. O be ngù ntôgnjù mba ngô tètntse ts'a ngùanesà là nke nywinte num o.

⁷ O lo' neta o mféb ba mbat yi nsi, ntaṅ ngù' tun tu wul o.

⁸ O be mbiagte ntshu' ntse, mbiagte ntshu' fetntse, mbiagte tshu'te benntùn.

⁹ Ben tse bo be ntswe num ntôg njù là be mbwôg tshu tsho tse nekuni, o ghù ṅwate dun bag ntumnyam mba bag mbinyam.

¹⁰ O be nse' ndôte tsha'a, mfà tshu yi yàme, o be mfà tshunkàb yi. Ta'ntse Nsi dun ntse. O be nabte ngefet ngelaṅ z'o tshab tsha',

¹¹ nzwi' nà, ntshu'te nkeb tsha'a, ndo' mbwe mbaṅ nywi' tsha' yi, naṅ mbotni num ju a bit bwe là.

¹² O be mfà tshu mebwô ntùm ngu'njù, nku mu nke mfà fu'.

¹³ Ntse tshwèt ntum mum nà z'a kônkwa là, nkônga dun ṅwate, mbe ntùm ṅwate.

¹⁴ Njùmbwe kab num nenà, ntômbo' be ndù ngefet ket mbu' bwe. Nze tsiaṅte mba njobkwi be njoṅ dù' fa mum ntômbo'o.