Yobkwi 64 - NTSHOB NSI

Nsi ma' ntshùa ba ntshubagnu

¹ Ntshagte yobkwi. Yobkwi David.

² O Nsi, ju' nz'àm, ngelaṅ me kua' wù là. Tshètte yôg sàm num ngakeban ze me be mbwôg i là.

³ Béb àm num kebàn ghatshùagntù, num nukebwô bwoṅ ghatshùagntù.

⁴ Bo be nkùa lém sob mba ṅwi là. Bo be ma' zwe ntshob mub à mba nkô là,

⁵ bo be ntam mbu' yi ntùm nelamte, bo be ntam i yi kua' ndende ke bwôg sàm ju.

⁶ Bo be nso neta num bo ntùm nukebwô yub. Bo be mbe ntshu ntshù', mbùn nkù. Bo be ntshob ndù: We z'a nsi yen yag à?

⁷ Bo be nkwate nefètte lem, ntshob ndù: Tshù bag li ndù njoṅ nu fa à ku'u. Nkwate yub b'a ntshù', ntù yub ghù ghem mum bwe.

⁸ Nsi be ntam yub mi nkô, a yoṅ ngom yube.

⁹ Nsi ma' yub nsi num lém sobe. Njoṅ benntùn fa tse bo be njen yub là nyi'te tu.

¹⁰ Bwôg ghom njoṅ benntùn fa, bo nke nsoṅ ju ze Nsi ghù là. Bo nsi ju' ju z'a ghù là.

¹¹ Mèn netsin be ntsiaṅte num Tshùaben, nke ndiag ze ndàlem num i. Ben tse bo ghù ntù netsin nà nsi nyàmte wut tshobe.