Yobkwi 63 - NTSHOB NSI

Bwôntù Nsi tshùa yôg

¹ Yobkwi David. Ngelaṅ z'a be num kônkwa Yuda là.

² O Nsi, o b'a Nsi àm, me be ndiag o. Ntù àm tshwèt nkù neyen o, me tshwèt nkô neyen o, me b'a mba dù' tsha' z'a ghage, njume, ntse ke be bwe là.

³ Ndùlala me be nze o ntùm ndà nelàne, ndù me yen neta o mba ghamt'o.

⁴ Nummbe kondèn o tanjoṅ ntshùa yôg, nkub ntshu màm be nyàmt'o.

⁵ Ndùlala me nsi ke ghamt'o njoṅ ngelaṅ fa me tshwèt njôg là. Me nsi ke bù' mbu màm tù num lén so.

⁶ Ntù àm nsi jù jujù nzit mba ze ndùmte ywèle. Tshu'te tsiaṅte nsi tum num nkub ntshu màm ke ghamt'o.

⁷ Me be nô num kunndà sàm nkwimt'o, nkwa nu num o njoṅ tèttswe' fa.

⁸ Nummb'o b'a ngaywimt'àm. Me be ṅwate bam netshaṅ mbàb mu.

⁹ Ntù àm taṅ tse num o, bu o ze zwim be ntomt'àm.

¹⁰ Là, ben tse bo be ndiag nebiagte yôg sàm nà nsi nèn tà nkum mà ntùm tsha'a.

¹¹ Bo nsi fà yub num ntshùag ṅwi. Bo nsi be jujù ba wunnyàm.

¹² Mfen nsi tsiaṅte num Nsi. Mba we lo z'a lo' i nkàn mfe yi là nsi ta' nsoṅ num bwe. Nummbe ntshu ghatatte nsi meme.