Yobkwi 62 - NTSHOB NSI

M'a' be fite mbaṅ Nsi

¹ Ntshagte yobkwi. Num ze mat Yédutun. Yobkwi David.

² Ṅ, ntù àm ke njab à num Nsi, ze yôg sàm fe à yi là.

³ Ṅ, a b'a nda' yi bèn mbe yàm ngabloṅ mba ngayôg àm, yàm mà neta ndàlem. Me ke nsi zi tiag tshàm.

⁴ Bin nsi ke tsho' vù num ta' mèn, lab i, mba kàbngô z'a ben nà, mba kàb z'a bùn nà tà nèn nkum ndùke?

⁵ Bo tsin tsham netèn i mfe num dù i z'a tà mfe tù là ma' nsi. Bo be ṅwate num tatte. Bo be njab kàn num ntshu bo, nke nso ndon ntù bo.

⁶ Ṅ, ntù àm, so wul o nda' num Nsi. Nummbe yàm nenywinte ke mfe à yi.

⁷ Ṅ, a b'a nda' yi bèn mbe yàm ngabloṅ mba ngayôg àm, yàm mà neta ndàlem. Me ke nsi zi tiag tshàm.

⁸ Yôg sàm mba ghamt'àm ke mb'a num Nsi. A b'a ngabloṅ z'a be nkabt'àm nà, yàm ndàlem b'a num Nsi.

⁹ Ngôngô, bin ke njab ntù zin num i njoṅ ngelaṅ fa. Bin gha'te ntù zin mbwe i. Nsi b'a ze be ndàlem.

¹⁰ Bon mèn nyiaṅtu b'a ju banban! Bon mèn nyiaṅtu b'a ghatatte. Bo ghù netamte njoṅ yub fa nko' num kilô, mfùag ntshùa ywèt ntshu mèn.

¹¹ Kà bin yab ntù zin num nefètte lem, ke ghù nywinte banban num tshô. Ngelaṅ fu' ke njàm nèn mbwe là, kà bin yab ntù zin num bwe.

¹² Nsi lo tshobe, me ju' tshen nu li bàa ndù: Nsi bèn ngù neta.

¹³ Tshùaben, o bèn ngù kondèn. Nummb'o be mba' mba we lo ndaṅndaṅ mba mfa' mi be yi là.