Yobkwi 60 - NTSHOB NSI

Nsi bùnte ben tse ghavù ntsha

¹ Ntshagte yobkwi. Yobkwi David, num netswite.

² Ngelaṅ z'a ma' ba Siria tse Mesôpôtamia mba tse Tsoba ntsho, Yoab be bèn njam nzwite ba Edom ntsha' ntshob bàa gham ntùm tômbo' ngwa là.

³ O Nsi, o lo tèn yage, nsate yage. O lo ya ntù, bèn mbù'te yage!

⁴ O lo nyi'te nsitsha'a, mfagt'é. Tamte njoṅ mfé tse fa, nummb'a tshwèt ngwù ù.

⁵ O ghù yu nzwit mèn yen tshu ts'a ta là. O ghù bag nu ndu' zwiaṅte.

⁶ Fà keki ben tse bo be mbwôg o là, ndùlala ndù bo kù ngoṅkét ntsin tà ngùanesà.

⁷ Tshu' ben ts'o be nkô yub là, lo' bu o ze zwim njôg yub yi, mbam le'te yag.

⁸ Nsi be ntshob ntùm ndà i ze nelàn ndù: Me nsi tshùa ntsho, me nsi ghabte Sikém, me nsi fi' tômbo' Sukkot;

⁹ me bèn ngù Galad, me bèn ngù Manasé; Efraim b'a kab z'a be mbéb tu àm nà. Yuda b'a kôg fen sàm.

¹⁰ Moab b'a tôntse se me be nsôg wul àm bwe là. Me te ko'fen sàm mum ngô Edom. Ngô ba Filistia, bin ghù tshu'te tsiaṅte num àm.

¹¹ We z'a nsi nèn tshag àm ntùm ngô neta à? We z'a nsi nèn tshag àm mà Edom à?

¹² O Nsi, a ke b'a wù na' mbèn ntèn yag ké? O Nsi, a b'a wù bèn mbe ke netum bin à tshag ntshu ntsho ké?

¹³ Fà ywimte bag ndo' mbate nge' yi. Ze ywimte mènntùn b'a nda' ka'te.

¹⁴ Bag à Nsi a' ghù nu ndùbndùb, a nsi nyiaṅte ghakeban tshag nywi'te yube.