Yobkwi 59 - NTSHOB NSI

Nsi àm, kwé àm bu ghankemban tshàm

¹ Ntshagte yobkwi. Kàte sate. Yobkwi David. Ngelaṅ ze Saulo na' ntum bo lam ba' mbume, nke ndiag nezwi David là.

² Nsi àm, tshu' àm mbu ghakeban tshàm, kabt'àm num ghamaṅt'àm.

³ Tshu' àm mbu ghatshùagntù, njôg àm mbwe gha mbu lem!

⁴ Tshù, bo tshwèt nya' àm nebiagte yôg sàm. Ben neta tsin tsham num àm, O Tshùaben, ke be ndù me fàn sàm ju, ke be ndù me ghù nukebwô!

⁵ Mba mba me b'a mbu' là, bo tshwèt nkù nde, nke nabte wut yub. Bam num miaglo. Se' be bumte, lôte njene!

⁶ Wù Tshùaben, Nsi z'a be tàndà ntsho là, Nsi Israél, lo nsi naṅ ntsha tu ba tum! Kà ko ndèn sàm mèn netèt tshen ben kebwô li tse bo ke' be ben nenùn nà!

⁷ Bo be mbèn nse' mfetnjù, bo be ntô mba mbù là, ndiaṅ ngô mbume.

⁸ Tshù, bo be mfé' ntshu yub nkib njoṅ ndù. Ṅwi num num nkub ntshu mube, lôte njene, we z'a ghù neju' yub à?

⁹ Mbe se' mba wù Tshùaben nà, o be nzwi yube, nke ntshabte ba tum.

¹⁰ Ke neta yub b'a be ndùke lo, mba me ke nywint'à nda' wù. Nummbe Nsi b'a yàm neta ndàlem.

¹¹ Nsi àm tshwèt nse' mbwe àm ntùm kondèn i, Nsi be ngù me nke nze ben tse bo tshwèt ntsho' nku màm kebàn nà ntùm tsiaṅte.

¹² Kà zwi yube, mbwôg ndù kà yàm nzwit mèn lagt'é. Tshùa njam ngù' o ngù bo ke ntsha, o ma' yub njam, me Tshùaben, wù z'o be yag tshètntsho là.

¹³ Nukebwô z'a ntshu bo là b'a ntshob mi a tum num nkub ntshu mub là. A bwô ndù yub ko'te wut tsho be num bo, num nu ndon bo be nso là, mba num tatte bo be ntshob là.

¹⁴ Sate yub ntùm tshùagntù o, sate yub ndù kà bo bèn nebe. A bwô ndù bo lèn ndù Nsi be ntô Yakob tà nèn nkum num ntôg njù.

¹⁵ Bo be mbèn nse' mfetnjù, bo be ntô mba mbù là, ndiaṅ ngô mbume,

¹⁶ Bo be ntsha, nke nèn bag bag, nke ndiag jujù. Là nke nzi ke be ndù bo jù njwèle.

¹⁷ Tu wul àm me nsi yob kwi num neta o. Me nsi nyàmte kondèn o neto' fe nkebnjù. Nummb'o b'a yàm neta ndàlem, mbe ndàlem mum lé'njù nge'.

¹⁸ O yàm neta! Me nsi nyàmt'a wù. Nummbe wù Nsi, Nsi àm ze mebwô, b'a yàm neta ndàlem.