Yobkwi 58 - NTSHOB NSI

Nda' Nsi bèn nke ntsho'te ntsha mèn

¹ Ntshagte yobkwi. Kà sate. Yobkwi David.

² Ndùlala b'a mbe bin be ntswe ntshu mi' kà ngù nunetsin ké? A b'a mba bin be ntsho'te ntsha bon mèn nyiaṅtu li ké?

³ Nga, bin be mfàn nu ntùm ntù tsine, mbu min b'a mi nefètte lem ntùm ngô, mbu min mi lem be nkag zwentù mum ngô.

⁴ Ghatshùagntù bag à fe bam mà yub. Ghatatte b'a ghafàn nze fe ndùse bo tum bam mà yub là.

⁵ Bo ghù njoṅ z'a fu ze nyu là, mbe mbu'ntoṅ mba swenyu z'a kabte toṅ i là.

⁶ Ke be ju' nze ghatatte, ke ze ngaka z'a lèn mfù ke se mebwô là lo.

⁷ O Nsi, be'te nsô ntshu bo, Tshùaben tsho' ngag ntshu bon ngwayit.

⁸ A bwô ndù bo mi mba ntse mi a tshwèt nké nswe' là, a bwô ndù nkét mub b'a mi a tshwèt là.

⁹ A bwô ndù bo be bite nke njag mba ta'ntshoṅ nà; mbite ke yen lagnyam mba sôbam nà!

¹⁰ A bwô ndù a be bit ntù' njô mba kwékwénàndô là, mbe te' ke nejum no, ndù yantù o z'a be mba fetmbaṅ nà kel i nèn yi.

¹¹ Mèn netsin nsi tsiaṅte ngelaṅ neyagte mba'a. A nsi sôg nku mi ntùm lem ghatshùagntù.

¹² Benntùn nsi tshob ndù: Ṅ, mèn netsin ghù nda' ntum, ṅ, Nsi num bwe z'a be ntsho'te ntsha mum njù là.