Yobkwi 57 - NTSHOB NSI

Yàm njam mvèn be Nsi mfe tù là

¹ Ntshagte yobkwi. Kà sate. Yobkwi David. Ndùs'a kù ndem mum ngabloṅ ngelaṅ Saulo ke nta' i là.

² Ko ndèn màm, me Nsi, ko ndèn màm! Nummbe ntù àm ke ndiag ndàlem à num o. Me ke ndiag ndàlem à bam mbàb mu, tà nkum ngelaṅ ze nge' nsi tôg là.

³ Me be nkua' ntsiaṅ Nsi z'a tà mfe tù là, Nsi z'a be ngù njoṅ i fa à num yàm ywimte là.

⁴ A nsi tsin mfe kamànyam tum yôg me. Là, mbe be ndù ngatsho' nku màm kebàn tshwèt nzin ntùm tshabte. Nsi a' tum bwôntù i mba nenùn i.

⁵ Tu wul àm, me nô netèt ngwayit tse bo tshwèt mfèt bon Adam nà. Nsô mub b'a nkô boa nkét. Lém sob b'a ṅwi ze bo kùa là.

⁶ O Nsi, sate wul o mfe kamànyam! A bwô ndù nkuni mu be num njoṅ nsitsha' fa!

⁷ Bo lo bùn nkù tun nku màm. Ntù àm nke ṅame. Bo lo tswe' tô mbwe àm. Bo vùte ntùm bwe.

⁸ Ntù àm tswe'te, o Nsi, ntù àm tswe'te. Me nsi yob kwi, me nsi bù'te nze tshu nebu'u!

⁹ Ntù àm, bam num miaglo! Loṅ sàm mba loṅ nse'e, bin bam num miaglo. Me nsi bam mfôgnjù.

¹⁰ Me nsi nyàmt'o netèt benntùn, Tshùaben, me nsi yob kwi netèt ba tum.

¹¹ Nummbe kondèn o ze ndùb num nèn tà nkum kamànyam, nu u ze nenùn nèn tù ntshùa ndot.

¹² O Nsi, sate wul o mfe kamànyam. A bwô ndù nkuni mu be num njoṅ nsitsha' fa.