Yobkwi 56 - NTSHOB NSI

Mèn bo tsho' nku mi kebàn nà ywèn wul i Nsi

¹ Ntshagte yobkwi. Yobkwi David. Ngelaṅ ba Filistia na' ngom i mà Gat là.

² O Nsi, ko ndèn màm, nummbe bo kamt'àm bag bag. Bo be ma' àm ntsho njoṅ lé'njù fa, bo be ntshu ntù àm.

³ Ghamaṅt'àm be nkamt'àm bag bag njoṅ lé'njù fa. Ben tse bo be ma' àm ntsho là yàm.

⁴ Ngelaṅ me be ntùm bwôg là, mba m'a' yab ntù àm num o.

⁵ Me nsi ghamte Nsi, me nsi ghamte ntshob mi. Me yab ntù àm num Nsi, me ke bwôg sàm ju. Ke ze be benntùn ghù m'à?

⁶ Bo ke' be tsin neke nko' tu àm, nke ngù à be nkwate kebwô num àm.

⁷ Bo be ntsin tsham, nke nya'a, nke mbwe ntshùa màm nummbe bo tshwèt nkô nebiagte yôg sàm.

⁸ Be bo ke tum ntshu vù num mfànnu mube. O Nsi, tshùa njam yantù o ma' ba tum nsi!

⁹ O siaṅte njoṅ nge' tshàm fa. Bo ke' kite njoṅ i fa ntùm ṅwa'ni ké? Lette njoṅ ntsenyà màm fa ntùm ntu' o.

¹⁰ Ghakeban tshàm be mbènte njam njam lé'njù ze me kua' là; me lèn ndù Nsi b'a yàm njam.

¹¹ Me nsi ghamte Nsi, me nsi ghamte ntshob mi. Me nsi ghamte Tshùaben, me nsi ghamte ntshob mi.

¹² Me yab ntù àm num Nsi, me ke bwôg sàm ju. Ke ze be benntùn ghù m'à?

¹³ O Nsi, me nsi ghù ndù nka'ni màm mi me ghù wù là mbumte. Nyàmt'o.

¹⁴ Nummb'o tshu' yôg sàm bu vù, mbéb nku màm nsi mb'a be a ke tiag là, ndùlala ndù me zin mbwe Nsi, num nka' ben tse bo be ntùn nà.