Yobkwi 52 - NTSHOB NSI

Mènntùn ngakô nkàb

¹ Ntshagte yobkwi. Yobkwi David.

² Num ngelaṅ ze Doég ze Edom na' nse' nsoṅ Saulo nu, ntshob ndù: David nèn ndà Abimélék là.

³ Nganeta, numk'o nke ngamte wul o num nukebwô o à? Bwôntù Nsi be mbe bwe njoṅ ndù fa.

⁴ O ke nkwat'a be nukebwô. Lém so b'a mba shua' nekom tu yi là. O be ntatte.

⁵ O be nkô nukebwô ntshùa numebwô, nkô tatte ntshùa nenùne.

⁶ O be nkô njoṅ ntshob fa mi a be nsat'a nesate là, wù lém s'a be ntatte là!

⁷ Ndùlala Nsi a' sat'o yoṅ ntshù', a nsi ghom o, sô o ntùm ntàb o. A nsi fiaṅ o ntùm njù ben tse bo be ntùn nà.

⁸ Ben netsin nsi yen i, bwôge. Bo nsi zwi i:

⁹ Tshù mèn z'a na' mbe ke ke ndo' Nsi mba ngabéb i, nke njab ntù i num màmà mfu' mi, nke mbe ngatshùa ntsho ntùm nukebwô i là.

¹⁰ Tu wul àm, me be ntùm ndà Tshùaben à mba ten s'a tshwèt nte' là. Me be njab ntù num kondèn Nsi njoṅ ndù fa.

¹¹ Me nsi ke nyàmt'o njoṅ ndù fa, num ju z'o ghù là. Me be nywinte num lén so, nummb'a bwô ndùlala num miag ben tse bo be nkô o là.