Yobkwi 49 - NTSHOB NSI

Mèn num mbe kwù ke lo' sàm ju

¹ Ntshagte yobkwi. Se bon Koré. Yobkwi.

² Njoṅ benntùn fa ju' yen nu li. Ba ntùm njù, bin kù' ntoṅ njoṅ zin fa.

³ Bônke' mba ndùbndùb, Ghankàb mba bwoṅbwoṅ, bin kù' ntoṅ nju'u!

⁴ Ntshu àm nsi tshob ntshob zenu, ntù àm ghù nkwate mi a be mi ntùn nà.

⁵ Me nsi kù' ntoṅ num tànkùt, me nsi yob kwi sàm num loṅe.

⁶ A be me bwôg mum lé'njù nge'; ngelaṅ mfànnu ghamaṅt'àm lam àm mbum n'a numke?

⁷ Bo yab ntù num tshu tshobe. Bo num nta' nsoṅ num fu' bo ghù là.

⁸ Be bo ke tshu' wut tshob bo bo; ke bèn mfà sàm ju Nsi mb'a na' ntshu' yub là.

⁹ Ju bo fà ndo' ntshu' ntù yub yi là tanjoṅ neshu, mbe ndù yen nu là ke nsi mi i.

¹⁰ Bo ke nsi ke njôg njoṅ ndù fa, be bo ke le'te neyen fi.

¹¹ Tshù, bo tshwèt njen ghazenu nke nkwù, nke njen kagni mba bo nke mfaṅ tshu tshob tsemo' ben.

¹² Mfi mub b'a mub mba' mi a tswe bo matmat là, yub dù'ntswe z'a tswe ngu'ngu' là. Bo be ndo' tsha' tshob nkwimte lén sob yi num nsitsha'a.

¹³ Là, mènntùn z'a be ntùm fu' là ke' lèn ndù a fut'a nyàm tse bo tshwèt ngwat yub là.

¹⁴ Tshù manze ben tse bo be njab ntù num tu wut tshob là. Tshù mb'a be miagte num ben tse bo be ngamte tu wut tshob là.

¹⁵ Bo be njab yub ntùm ngô fe ben mba bwoṅ nyàm nà. Vùkob be ntshagte yube, bo swe' ndaṅndaṅ nèn tà mà ntùm fi, ngô fe ben, tù' dù'ntswe yube.

¹⁶ Là, mbe se' mba me là, Nsi a' tshu' ntù àm. nummb'a nsi sô àm ntùm nkib vùkob.

¹⁷ Kà tshàm mba mènntùn tshwèt ntsho mum fu' là, mba tshunkàb ts'a ndà i tshwèt njàm nà.

¹⁸ Nummb'a be mbe kwù ke lo' sàm ju nèn yi. Tshunkàb tse ke' be tam njam i.

¹⁹ Mba mb'a ke ṅwate ntùm yôg se nke nso ghamte num i ntùm tsiaṅte ts'a ke mbe ntùm bwe là,

²⁰ a nsi tum bwe nèn tèt ze zwiaṅ ba tà tse tse bo ke nsi bèn yen nelàn nà.

²¹ Là mènntùn z'a be ntùm fu' là ke' lèn ndù a fut'a nyàm tse bo tshwèt ngwat yub là!