Yobkwi 44 - NTSHOB NSI

Mba ndùlala, ndù o ghua' yage

¹ Ntshagte yobkwi. Se bon Koré. Yobkwi.

² O Nsi! Bag lo ju' yen nu là ntoṅ mage, tà tshag lo soṅ yag mfa' mi o na' mfa' num yub ngelaṅ, mum lé'njù ts'a be mbwe là.

³ O lo lo' bu o nta' ngôngô yi kà nte yube. O lo sate benntùn kà ngù bo nga'te yub ngô.

⁴ Nummbe bo lo ke lo' yub ṅwi kà ndo' ngô yi. A ke' b'a mbu mub na' mbèn ngù bo ntshùa ntsho. Là, a b'a bu o ze zwim, a b'a bu o, a b'a nka' z'a be num se o là, nummb'o num nkô yube.

⁵ O Nsi, o bèn mbe yàm mfen, o bèn ngù Yakob ntshùa ntsho.

⁶ Bag be ndo' o ma' ghakeban tshag yi nsi. Bag be ndo' lén so nyiaṅte ghakeban tshag yi.

⁷ Nummbe me ke' ke njab ntù àm à num ngoṅkél àm. A ke' b'a ṅwi àm bèn nke ngù me ntshùa ntsho.

⁸ Là, a b'a wù bèn nke ntshu' yag mbu ghakeban tshage, nke nso tuswe num ben tse bo be ntsho' nku mag kebàn na.

⁹ Bag be nta' nsoṅ num Nsi njoṅ lé'njù fa. Bag nsi ke ghamte lén se njoṅ ndù fa.

¹⁰ Mba tà ndùlala o be ntèn yage, nso tuswe num bag, ke bèn ntum bin à tshag ntshu ntsho;

¹¹ o be ngù bag bènte tuntun mbwe ngakeban. Ben tse bo be mban yag là lagte tshu tshage.

¹² O be mfà yag bo mba njùmbwe tse bo fèt yub là. O be nsate yag netèt ba tum.

¹³ O be nswèn ngô o banban. O ke' jù bin i sàm ju.

¹⁴ O be ndo' yag ngù ju tuswe yi mbwe ba ndùla' bag, ngù bag tù' ju tshabte mba ju komzwi mbwe ben tse bo lam yag mbum nà.

¹⁵ O be ndo' yag ngù ju tànkùt yi netèt ba tum, ndo' yag ngù ju neko' shua'mbe' yi netèt ba tum.

¹⁶ Yàm tuswe ke mb'a mbwe àm njoṅ ndù fa. Tuswe kut se àm,

¹⁷ ngelaṅ me ju' nze ngatshabt'àm mba ngatut'àm mbwe ngakeban bo ngayagte mba' là.

¹⁸ Njoṅ i fa be ntsho num bag ke be ndù bag lagt'o, ke be ndù bag be ngua' kàn so.

¹⁹ Ntù tshag ke' to' lo tse num o, nku mag ke' to' lo tse num yu manze.

²⁰ Mba ndùlala o lo ma' yag kônkwa, ngù njam kabte yage.

²¹ A lo mbe ndù bag lagte lén Nsi yag, ntshag mbu mag mo' nsi ghua,

²² mba Nsi ke' lèn ké, yi z'a lèn njoṅ ntsham fa mi a ntù mènntùn n'à?

²³ Là, a b'a num o ze bo be nzwi yag njoṅ lé'njù fa, ndo' yag mba njùmbwe tse bo zwi yub là.

²⁴ Tshùaben, bam num miaglo, numk'o nke nzi à? Bam num miaglo, kà tèn yag yoṅ ntshù'.

²⁵ Numk'o ndem se o à? Numk'o ntshù nsi num nge' yag mba ngùtni yag à?

²⁶ Nummbe ntù yag bot, bag vù num mbabe. Bo taṅ wut yag num tsha'a.

²⁷ Lo nsi njwimte yage. Tshùa njam kondèn o ntshu' yage.