Yobkwi 39 - NTSHOB NSI

Faṅ me zwiage, yôg vogte

¹ Ntshagte yobkwi. Se bo yob Yédutun nà. Yobkwi David.

² Me lo tshob ndù: Me nsi ywèn num manze tshàm, mbwôg ndù kà me lo' lém sàm ngù nukebwô yi. Me nsi mem ntshu àm, njoṅ ngelaṅ fa ze mèn kebwô nsi be mbwe àm nà.

³ Me lo tswe mba ketshob là, ntswe ndù kam, me lo tswe ke tshob nu, mba mba me na' mb'a ngayennge' là. Yàm ya lo ke b'a ze nefùage.

⁴ Ntù àm lo ke nkù mà ntùm wul àm. Mo' mbwôg lo ke nkù àm ntùm bwe. Me lo ke ntshob ndù:

⁵ Tshùaben, soṅ dù' ze yôg sàm nsi miagte bwe là. Mfi' yôg sàm b'a njoṅ ndùke, me lèn mba me fùag l'à?

⁶ Tshù, o fà mfi' lé'njù tshàm, a b'a njoṅ tôbu mèn, yôg sàm ke b'a sàm ju mbwe o. Ṅ, mba zit mèn no z'a tsin tù là b'a mba ywèt ntshu là.

⁷ Ṅ, mènntùn ke nkatt'a mba netshaṅ nà, nke ndab wut banban. A be ntse'te tshu ke lèn mèn z'a nsi ghù lo' là.

⁸ Tshùaben, be me nywint'a ke ndonni à? Yàm nenywinte fa b'a num o.

⁹ Tshu' àm num njoṅ mfànnu màm fa. Kà ghù ndù tuswe nkagni ko àm.

¹⁰ Me vù ketshob, me ke' gha' ntshu àm, nummb'o lo kô ndù a be ndùlala.

¹¹ Bèn mbu mu njam k'a bèn nelab àm, me be ngwù nsi ngelaṅ bu o kwag àm nà.

¹² O be ntshobte mèn, naṅ ntsha tu i num mfànnu mi. O be mfèt ju z'a tanjoṅ yi là ndaṅndaṅ mba bangùa be mfèt tshu là. Ṅ, mba zit mèn no b'a mba ywèt ntshu là.

¹³ Tshùaben, ju' le'te, nkù' ntoṅ num nkua' màm. Kà tù' mbu' mbwe ntsenyà màm! Nummbe me b'a ngùn la' o, ntshùanze ntùm ngô ndaṅndaṅ mba njoṅ tà tshàm fa là.

¹⁴ Tsho' lag so num àm, mfaṅ ndù me zwiage, kà ke bèn nebe.