Yobkwi 34 - NTSHOB NSI

Tshùaben sô àm ntùm njoṅ yàm nebwôg fa

¹ Yobkwi David. Ngelaṅ z'a na' ngù mba ngazwiaṅte mbwe Abimélék, nkù nèn ndùs'a ta' i là.

² Me nsi ke ghamte Tshùaben njoṅ ndù fa. Nenyàmte nsi ke be num ntshu àm njoṅ ndù fa.

³ A bwô ndù ntù àm ghamte wul i num Tshùaben. A bwô ndù ghayennge' ju'u, mbèn ntsiaṅte.

⁴ Bag bin ghamte Tshùaben! Bag bin ghamte lén se njoṅ be fa.

⁵ Me lo diag Tshùaben, a bùnte me. A lo tshu' àm num njoṅ tshàm bwôg fa.

⁶ A num mbe ngelaṅ mèn kaṅ wul i nke ndôt'é là, mba tsiaṅte nsi ke tum num ng'é, tuswe ke bèn nkut se i.

⁷ A num mbe ngelaṅ ngayennge' kua' là, Tshùaben ju' nz'é, njôg i num njoṅ nge' tse fa.

⁸ Angél Tshùaben be ntswe ben bo be mbwôg Tshùaben nà, nkwé yub bu nge'.

⁹ Bin lôte njen mba Tshùaben bwô là! Mènfen b'a mèn z'a be ndiag ze ndà lem num i là!

¹⁰ Bin bwôg Tshùaben, bin ben tse tse nelàne, nummbe ju ke' be bwoṅ ben tse bo be mbwôg i là.

¹¹ Kekua mba nziku' be nja bon ngwayit ghankàb be ntù' bwoṅbwoṅ nziku' ya yube, là ben tse bo be ndiag Tshùaben nà ke' be bwoṅ sàm ju.

¹² Bon tshàm, bin se' nju' àm, me nsi tswite zin nebwôg Tshùaben.

¹³ We z'a be nkô yôg, we z'a be nkô nekwi'te ngelaṅ yôg ndù a ke ntsiaṅte ntùm fu' à?

¹⁴ Tshùb lém so num nukebwô, mba nkub ntshu mu num ntshob tatte.

¹⁵ Kù nukebwô, ngù numebwô. Diage, mbèn ntam njam fite.

¹⁶ Miag Tshùaben be nte num ben netsine, a bèn nke nkù' ntoṅ neju' nkua' mube.

¹⁷ Tshùaben be nkaṅ mvèn i, ntsho' lag se num ghatshùagntù, ngù bo ke bèn nekwimte yub num nsitsha'a.

¹⁸ Ben netsin be nkua'a, Tshùaben ju', ntshu' yub num njoṅ nge' tshob fa.

¹⁹ Tshùaben b'a mbaṅ ben tse ntù yub be'te là, nke njôg ben tse ntù yub tshwèt mvètte là.

²⁰ Nge' ke njab mbu à num mèn netsine ngelaṅ yàme. Là Tshùaben be ntshu' i bwe njoṅ ndù fa.

²¹ A be mbéb njoṅ mvôg mi fa, kà mba se ntshù' ke be'te.

²² Nge' be nzwi tshùagkèt mèn. Tshùaben be naṅ ntsha tu ghakeban mèn netsine.

²³ Tshùaben be ntshu' ntù ghafa' tse. Ntsha ke' be vù tu njoṅ benntùn fa tse yub ndàlem b'a num Tshùaben nà.