Yobkwi 31 - NTSHOB NSI

Tshùaben, o b'a ngatomt'àm

¹ Ntshagte yobkwi. Yobkwi David.

² Tshùaben! Me ke ndiag yàm ndàlem à num o. Kà bam ndù tuswe zi nko àm! Tshu' àm num yu nunetsine.

³ Ben toṅ o num àm! Nànte njwimt'àm. Be ngabloṅ z'a be ntshètt'àm nà. Be yàm ndàlem, dù' ze me be mfon yôg sàm nà.

⁴ Nummb'o b'a gholoṅ sàm, mbe yàm ndàlem; a nsi tshùa num lén so, o soṅt'àm, o nsi tshagt'àm.

⁵ O nsi ghù me tum ntùm nkù ze bo bùn àm yi là, nummb'o b'a ngatshagt'àm.

⁶ Me yab ywèt tshàm ntùm mbu mu. Tshùaben, Nsi nenùn, o nsi tshu' àm.

⁷ Me be mbàn ben tse bo be ndat wut num neto banban nà. Me be njab ntù àm num Tshùaben.

⁸ Me nsi tshùa njam kondèn o be ntùm tsiaṅte mba ntùm ṅwate, nummb'o yen ngùtni àm, o lèn nge' tse ntù àm be ntùm bwe là.

⁹ O ke nsi fà àm mum mbu ngakeban. O nsi ghù me ta'te nku màm.

¹⁰ Tshùaben! Ko ndèn màm! Nummbe me b'a ntùm nge'. Miag màm, ntù àm mba wul àm bot ntùm nywin.

¹¹ Kà biagte yôg sàm. Fém fam ngu'njù tshàm, a tshùa njam ngùtni àm neta àm mi fa, mvôg màm kôgte.

¹² Njoṅ ghakeban tshàm fa ghù me tù' ju tuswe, mbe tuswe ndùb tshàm ba ndù la', mbe bwôg netèt shun tshàm. Ben tse bo be njen àm njù là be nkù nèn ngùanesà mbaṅ àm.

¹³ Njoṅ benntùn fa lagt'àm mba bo num ndagte mèn z'a kwù là. Me be à mba kab z'a tsit là.

¹⁴ Me be nju' nkwate kebwô ben yàme, fétwut z'a lam àm mbum nà. Bo be ntamte ngù nkwate ghe'te num àm. Bo tam ntshu ngù ntshù' yi nebiagte yôg sàm.

¹⁵ O! Tshùaben, me be njab ntù àm num o, ntshob ndù: O b'a Nsi àm!

¹⁶ Njoṅ yàm nebe fa b'a mum mbu mu, tshu' àm mbu ghakeban tshàm mba mbu ghatsho' nku màm kebàn.

¹⁷ Ghù ndù se o ké' num ngafa' o; yôg àm njam kondèn o!

¹⁸ Tshùaben, kà bam ndù tuswe ko àm ngelaṅ me tsiaṅ o là. A bwô ndù tuswe ko ghatshùagntù. A bwô ndù bo swe' nèn ngô fe ben à ntshu mi'i.

¹⁹ A bwô ndù nkub ntshu mi tatte vù ketshob, nkub ntshu mi a be ndo' ka'te ntshob nu yi num mèn netsine, nke ndo' ta'te mba newag ntshob yi là.

²⁰ Tshù mba bwôntù o zi njene, bwôntù z'o lé' nefà ben tse bo be mbwôg o, z'o be nkwé nta ben tse bo be ndiag yub dù' lem num o yi, mbwe bon mèn nyiaṅtu là!

²¹ O be ndem yub bam netshaṅ se o num ben tse bo be ntsho' nku mu kebàn nà. O be ndem yub ntùm ntàb o num ben tse bo be nkamte yub là.

²² Ghamte be Tshùaben! Nummb'a lo la'te kondèn i num àm, ngù m'à mba me na' mbe tshàm à ntùm ngô ze bo kut ndiaṅ mbum nà.

²³ Me lo ke ntshob ntùm yàm nenànte ndù: Bo ta' àm ntshag tà ngùanesà mbwe o! Là o lo ju' nze njoṅ tshàm le'te fafa, ngelaṅ me ke nkua' ntsiaṅ o là.

²⁴ Bin kô Tshùaben, bin tse bin be tse ben nà. Tshùaben be ndem ben nenùne, nke nso ntsha kebwô num ghako'tewut.

²⁵ Bin lo' neta, ngù tànntù, bin tse bin be nywinte num Tshùaben nà.