Yobkwi 28 - NTSHOB NSI

Le'te Nsi ngwù vù

¹ Yobkwi David. Tshùaben, me ke nkua' à wù. Ngabloṅ sàm, ju' nz'àm, kà vù mbu'u, mbwôg ndù a be z'o nèn ngùanesà ke bùnte me là, kà me tù' mba ben tse bo be nswe' ntsho ntùm tô là.

² Ju' mba me tshwèt nde't'o ngelaṅ me tshwèt nkua' ntsiaṅ o là, ngelaṅ me tshwèt mbù' mbu màm ntshag nze mbaṅ ndà o ze nelàn nà.

³ Kà lo' àm bag à ben kebwô mba ghatshùagntù, tse bo be ntshob nu fite mèn a ghebte mbaṅ i, là nukebwô be ntù i là.

⁴ Ghù bo ndaṅndaṅ mba mfa' mub be yi là, ndaṅndaṅ mba ngùninu mub mi kebwô be yi là, ghù bo ndaṅndaṅ mba mfa' mub be yi là. Fà nkàb fa' z'a ku'ni num o là bo.

⁵ Nummbe bo ke' be kù' ntoṅ num mfa' Tshùaben, num mfa' mbu mi. A nsi ma' yub nsi, a ke nsi bèn bù' yube.

⁶ Mbotni be Tshùaben! Nummb'a be nju' nze tshàm le'te.

⁷ Tshùaben b'a yàm neta mba yàm tshètntsho. Ntù àm be njab à num i, a ywimt'àm. Me tshwèt ṅwate tshàm ntùm ntù àm, nke nyàmt'é ntùm njobkwi màm.

⁸ Tshùaben b'a ze neta ze nzwit mèn, mbe ndàlem mba ngayôg ze ngayo' mfèt.

⁹ Yôg yu nzwit mèn, naṅ mbotni num ju tsi' o. Be ngabéb yub mba yub ntom njoṅ ndù fa.