Yobkwi 27 - NTSHOB NSI

Me num nju' mebwô mbaṅ Tshùaben

¹ Yobkwi David. Tshùaben b'a yàm nelàne, mba sàm yôg: Be me bèn mbwôg à we? Tshùaben b'a ntom yôg sàm: Be we kag bwôg num àm à?

² Ngelaṅ ghatshùagntù lo nsi nke nse' num àm, num nesé'te mbàb àm nà, mb'a b'a ghatsho' nku màm kebàn mba ghakeban bèn vù nsi.

³ A be ze ta' ntshu ntsho naṅ mbaṅ àm nà, mba me ke nsi bwôg sàm ju. A be ze mo' ntsho lo num àm nà, mba mba ndùlala me nsi yab ntù àm num o.

⁴ Me be mbètte Tshùaben ta' ju ntshù', ze ntù àm be nkù bwe neshu là: Me be nkô neke ntswe ntùm ndà Tshùaben njoṅ lé'njù yôg sàm fa, ndùlala ndù me lôte bwôntù Tshùaben mba ndù me nyàmte ndà i.

⁵ Nummb'a nsi kabt'àm ntùm ntàb i mum lé'njù nge'. A nsi lem àm bam netshaṅ ntàb i. A nsi te àm num ngabloṅ.

⁶ Tshù, tu àm dut ghakeban tshàm tse bo diaṅ àm mbum nà nèn tù. Me nsi fà tshule'te Nsi ntùm ntàb i, mbe fà nke ntô nta. Me nsi yob kwi, me nsi ghamte Tshùaben.

⁷ Tshùaben, ju' nz'àm, me tshwèt ntsiaṅ o. Ko ndèn màm, nju' le't'àm.

⁸ Ntù àm be ntshob num yu tu ndù: Diag se Tshùaben! Me be ndiag se o me Tshùaben.

⁹ Kà lemt'àm se o, kà tèn ngafa' o ntùm yantù. O b'a ngaywimt'àm, kà kag àm, kà ghua' àm, Nsi ngayôg àm.

¹⁰ Nummb'a be ze tàa, mba màa ghua' àm nà, mba Tshùaben nsi lo' àm.

¹¹ Tshùaben, tswit'àm yu manze, tshagt'àm num manze netsine, num nu ghakeban tshàm.

¹² Kà fà à mba ghakeban tshàm tshwèt nkwate là. Nummbe ghakwénta tse tatte lo nsi num àm, ben tse bo ke nse' à be nefètte lem nà,

¹³ o, a lo mbe be ndù me ke' yà lèn ndù me nsi yen bwôntù Tshùaben, num tsha' ben bo be ntùn nà!

¹⁴ Nywinte num Tshùaben! Lo' neta mbèn ntswe'te ntù o! Nywinte num Tshùaben!