Yobkwi 22 - NTSHOB NSI

Nsi àm, Nsi àm, ke bèn ngù o ghua' à?

¹ Ntshagte yobkwi. Num nze shutnyàm nkebnjù. Yobkwi David.

² Nsi àm, Nsi àm! O ghua' àm numke? O nèn ngùanesà ke ywimt'àm, ke ju' nkua' màm numke?

³ Nsi àm! Me be nkua' wù mbwôgtshù, o ke bùnte, nkua' wù tèttswe', ke ghù sàm fite.

⁴ Là ndù o b'a nelàne. O te ko'fen num njoṅ mi njobkwi Israél fa.

⁵ Tà tshag lo ke njab ntù num o. Bo lo ke nkua' wù, o yôg yube;

⁶ bo lo ke njab ntù num o, ntsiaṅ o, o yôg yube; tuswe lo ke ko yube.

⁷ Mba me là, me b'a ywèt, ke b'a mènntùn, me b'a ju tuswe netèt benntùn, mèn ze benntùn be ngwag i là.

⁸ Njoṅ benntùn fa tse bo be njen àm nà be ntshab àm, bo be nga' ntshu yube, nyi'te tu yube, ntshob ndù:

⁹ A lo yèn wul i Tshùaben. A bwô ndù Tshùaben yôg i. A bwô ndù Tshùaben yôg i, nummbe Tshùaben be nkô i.

¹⁰ Ṅ, o lo ghù me tum bam màa, o lo lem àm ndà ntù màa.

¹¹ Me lo ke ghù mo' mèn fe bam màa k'a ke nda' wù. O lo be Nsi àm fe bam màa.

¹² Kà nèn ngùanesà mbaṅ àm nummbe nge' ghebte, nummbe sàm mèn ke tshwèt nse' ywimt'àm.

¹³ Mfot mfô yàm kaṅt'àm, mfot mfô Basan diaṅ àm mbume.

¹⁴ Bo gha' ntshu yub num àm, a tswe mba ngwayit z'a tshwèt nsé'te ju z'a ghome, nke nkua' là.

¹⁵ Me be à mba ntse mi a tshwèt nswe' là, mvôg màm kamte. Ntù àm be à mba nyiaṅṅwa' là. A be njag ntùm bam sàm.

¹⁶ Ntag màm jum mba tsha' là, lém sàm lat bam ntag màm, o nsi yab àm mum mbàb vù.

¹⁷ Nummbe ba mbù diaṅ àm mbume, ba fimntshu tshwèt ndiaṅte mbaṅ àm. Bo tote mbu màm mba nku màm.

¹⁸ Be me siaṅ njoṅ mvôg màm fa. Tshù, bo tshwèt nz'àm, bo tshwèt ndôt'àm.

¹⁹ Bo ghabte nzwe tshàm bo bo, ndo' kum sàm ntam tô yi.

²⁰ Tu wul o, wù Tshùaben, kà nèn ngùanesà! Wù z'o be yàm neta là, se' ndende njwimt'àm!

²¹ Béb àm num ṅwi, béb yôg sàm num ba mbù!

²² Yôg àm ntshu ngwayit, kwé àm num ndô nyatnyàm!

²³ Me nsi soṅ lén so netèt fèt tshàm, me nsi ghamt'o netèt mbumte.

²⁴ Bin tse bin be mbwôg Tshùaben nà, bin nyàmt'é! Njoṅ zin fa, nzwit Yakob, bin ghamt'é. Bin nzwit Israél, bin vètte mbwe i.

²⁵ Nummb'a lo ke wag, ke bèn ntshèt ngùtni ngayennge'. Nummb'a lo ke lem i se i, là nke nju' i ngelaṅ z'a kua' ntsiaṅ i là.

²⁶ Me nsi tshùa njam kondèn o, yob kwi so ntùm mbumte ndùb. Me nsi zwiagte yàm nka'ni mbwe ben tse bo be mbwôg o là.

²⁷ Bwoṅbwoṅ nsi jù ywèle, ben tse bo be ndiag Tshùaben nà nsi ghamt'é. A bwô ndù ntù zin tswe matmat.

²⁸ Njoṅ bag njù fa nsi kwimte Tshùaben, kaṅ wut tam njam i. Njoṅ tunndà ngôngô fa nsi kwim ntunkekwi' mub nsi mbwe i.

²⁹ Nummbe nu nesa' fen b'a ze Tshùaben. A be ntô njoṅ ngôngô fa.

³⁰ Ben tse bo be ntùm tsha' là nsi kwim ntunkekwi' nsi à nda' mbwe i. Njoṅ benntùn fa bo nsi nèn ntùm tsha' là nsi vù nsi mbwe i, ben tse bo ke' ku'ni nelem yôg sob là.

³¹ Nzwil àm nsi fa' yi. Bo nsi tshob lén Tshùaben nzwit z'a nsi tum mànjam nà,

³² a nsi soṅ nunetsin Tshùaben ben tse bo nsi se' là. A nsi soṅ fa' se tumngô nswe. Tshùaben bèn ngù ndùlala.