Yobkwi 19 - NTSHOB NSI

Ghamte Nsi ntùm njù. Kàn Tshùaben

¹ Ntshagte yobkwi. Yobkwi David.

² Kamànyam num ntshob ghamte Nsi, njoṅ ngabnjù fa nke nsoṅ mfa' mbu mi.

³ Mo' lé'njù be nzi'te mo' lé'njù, mo' tèttswe' fà nelèn mo' tèttswe'.

⁴ Ke tshob nu, ke tshob ntshobe, sàm mèn ke ju' nze yub,

⁵ Nze ntshob be nèn mum njoṅ njù fa, là sob nèn nkum mum ntôg njù, dù' z'a te ntàb lagnyam bwe là.

⁶ Lagnyam fut'a nzwingùn z'a tum to'nd'é là; lagnyam be ṅwate mba ngatshùa ntsho là nelo bag ntumnyam nkum bag mbinyam.

⁷ A be ntum num mo' bag kamànyam, nèn miagte nde mi num mo' bag kamànyam. Be sàm ju ke le'te ndum mi.

⁸ Ntshù' Tshùaben bwô neshu, a be ntswe'te ntù, nkàn Tshùaben b'a mi nenùne, nkàn Tshùaben be ngù nkagni tù' nzenu.

⁹ Ntshob Tshùaben b'a mi netsine, ntshob Tshùaben num ngù ntù mèn tsiaṅte. Kàn Tshùaben làn, kàn Tshùaben be ndànte miag.

¹⁰ Nebwôg Tshùaben làn, a tswe tse yoṅ ntshù'. Tse tsho'te ntsha fa tsin.

¹¹ Bo tanjoṅ ntshùa gol, ntanjoṅ ntshùa gol z'a làn neshu là. Bo dùm ntshùa ṅwa'a, ndùm ntshùa ṅwa' z'a num nké num nkekùà ṅwa' là.

¹² Mba ngafa' o num nzi'te yen ju là. Nda' mèn z'a be nze njoṅ i fa là b'a ze ndùb.

¹³ We z'a be ndèn mi mfànnu à? Lagte mba tse me ke' lèn nà me.

¹⁴ Tshètte ngafa' o mba num ghako'tewut. Kà bam ndù bo tô ntù àm, ndùlala me nsi be kelo', be mbu' num nukebwô ndùbndùb.

¹⁵ Bam ntshob mi a tum ntshu àm nà, mba nkwatenu mi a ntù àm nà, o! Tshùaben ngabloṅ sàm mba ngatshu' àm.