Yobkwi 17 - NTSHOB NSI

Ndonni, se' njwimt'àm

¹ Nele'te Nsi. Ze David. Tshùaben ze yàm nunetsin ke mfe à yi là, ju' nkua' màm, kù' ntoṅ nju' yàm le'te ze me tshwèt nde't'o yi nkub ntshu màm mi tatte ke' be bwe là.

² Yàm tsho'te ntsha nsi fe à wù, miag mu lôte dù' ze nunetsin be bwe là.

³ A be z'o lôte ntù àm, a be z'o nèn tshù i tèttswe' là, a be z'o laṅt'àm nà, mb'o ke yen sàm ju. Nkwat'àm ke b'a ze ghua, ntshob mi a num ntum ntshu àm nà ke be mi ghua.

⁴ Me num mbe yen ngùninu benntùn, mba me be mèn nenùn num ntshob mi à tum num nkub ntshu mu là, me lo nsi num manze ba fimntshu.

⁵ Nku màm ta nsi num manze tsho, nku màm ke zi ntiage.

⁶ O Nsi àm, me be ntsiaṅ o, nummb'o be nju' le't'àm; ben toṅ o nsi nju' ntshob màm.

⁷ La'te kondèn o, wù ngayôg ben tse bo be ndiag ndàlem num o là. O be njôg yub mbwe ben tse bo be maṅte neta o là.

⁸ Lem àm mba nyilag mèn nà, lem àm bam mbàb mu.

⁹ Num ben kebwô tse bo tshwèt ntsho' nku màm kebàn nà, num ghakeban tshàm tse bo lam àm mbum nà.

¹⁰ Bo fùn ntù tshobe, bo ghù ntshob ka'te ntshu bo.

¹¹ Bo b'a njam nku be, tshù, bo diaṅ be mbume. Bo tshwèt nya' be num neso be nsi.

¹² Mba ngwayit ze nziku' ya i, a nke ndiag ju nefèt là, mba mén ngwayit z'a tshwèt nya' ju ntùm dù'ntswe i là.

¹³ Tshùaben lo nsi nzin nèn bin yi bumte, ma' i nsi. Lo' ṅwi o ntshu' àm yi mbu ghatshùagntù.

¹⁴ Tshùaben lo' bu o nzwite yub yi. Sô sob bag yôg. So ju z'o yab bo là bam bo, a dune, bon tshobe jù njwèle, njab tshé'é z'a sag yub là bon bon tshobe.

¹⁵ Mba me là, me nsi yen se o, nummbe me b'a mbu'u, njù nsi be làne, ndù m'a ywèt neyen se o.