Yobkwi 16 - NTSHOB NSI

Tsiaṅte mèn ze Nsi yôg i là

¹ Miktam David. O Nsi, béb àm! Nummbe yàm ndàlem b'a num o.

² Me be ntshob Tshùaben ndù: O b'a Tshùaben àm. Njoṅ yàm fu' fa b'a mbaṅ o.

³ Me bèn ntshob ben nelàn tse bo be ntùm ngô là ndù: Bo b'a kua' ben ndùbndùb tse me kô yub neshu là.

⁴ Tsemo' ben be ngù ba nsi neto nke njàm nèn mbwe, bo nke nkù nde njam tse nsi ba tum, mba me là, me ke nsi fètte lem bo mba jule'te Nsi là, me ke nsi tsi lén sob num nkub ntshu màm.

⁵ Tshùaben b'a màm ntsi'i, mbe sàm fu', a b'a wù Tshùaben bèn nke mbéb yàm njam.

⁶ Yàm ju ntsi' ze me kwé là b'a ze ntùn, yàm kam i ze me ghù là bwô neshu.

⁷ Me num ngamte Tshùaben, yàm ngafà ntage, a num mbe mba tèttswe' ntù àm nke ntagt'àm.

⁸ Me be nkwimte Tshùaben njoṅ ndù fa. Ngelaṅ z'a b'a num bag bu àm ze zwim nà, mba me ke nsi vù nsi.

⁹ Ndùlala ntù àm b'a ntùm tsiaṅte, ywèt tshàm nke ṅwate, wul àm tswe ndù kam ntùm fite,

¹⁰ nummb'o ke nsi faṅ zwiag sàm ghô ntùm ngô fe ben, ke bam ndù mén o z'o be nkô i là bi.

¹¹ O nsi ghù me lèn manze yôg. Tsiaṅte gha' mbu mbwe o. Yôg mebwô z'a tswe matmat là num num bag bu o ze zwim.