Yobkwi 146 - NTSHOB NSI

Tshùaben b'a ngatomte fikèt ben

¹ Aléluya! Ntù àm, ghamte Tshùaben.

² Me nsi ghamte Tshùaben num njoṅ lé'njù yôg sàm fa. Me nsi ke yob kwi Nsi àm ngelaṅ me ke' ntùn nà!

³ Kà bin yab ntù num ben ndùbndùb, num bon mèn nyiaṅtu tse bo ke yôg zin nà;

⁴ zwiag sob be mi, bo bèn njam ntùm tsha'a, mub ntenu bi ze be sen lé'njù là.

⁵ Mènfen b'a mèn ze ngaywimt'é b'a Nsi Yakob, ze ze nenywinte b'a num Tshùaben Nsi i là,

⁶ Nsi z'a nabte kamànyam mba tsha'a, dibantse mba njoṅ tshu fa ts'a ntùm bwe là. A num ndé' nunenùn matmat.

⁷ A be ngù nu ndaṅndaṅ ben tse bo fétte yub là, mfà bàn ben tse nziku' ya yub là, Tshùaben be nsô mvèt bu ghandàtsha.

⁸ Tshùaben be ngù mfùmiag yente, Tshùaben be ntsiagte ben tse bo ṅam nà, Tshùaben be nkô ben netsine,

⁹ Tshùaben be ntshètte ghùn, Tshùaben be ntomte ménntse mba mfôg mènnzwi, là, a be nkaṅ manze ghatshùagntù.

¹⁰ Tshùaben be nsa' ngu'ngu'. Sion, Nsi o be nsa' matmat. Aléluya!