Yobkwi 144 - NTSHOB NSI

Le'te Nsi mfen

¹ Yobkwi David. Ghamte be Tshùaben, gholoṅ sàm, yi z'a be ntswite mbu màm nele' ntsho, ntswite ntu mbu màm nema' ntsho là.

² A b'a yi bèn mbe yàm ngaghù mebwô, yàm ndàlem, yàm neta ndàlem mba ngatshu' àm; a b'a yàm tshètntsho ze me be ndem bwe là, a be ma' ngôngô nsi tun ku àm.

³ Tshùaben, mènntùn b'a ke k'o ndèn i, mèn nyiaṅtu b'a ke k'o nke nkwimt'é ndù à?

⁴ Mènntùn be ndaṅndaṅ à mba ywèt ntshu mèn nà, lé'njù tse nke ntôg mba netshaṅ nà.

⁵ Tshùaben, lo' kamànyam o nse' yi nsi, nswe'e. Kwag ba mbale, ndù bo sô nzembwôge.

⁶ Kag mbeba'mbaṅ, nsate ghakeban, ma' nkét mu, ngù bo kaṅ wut yub.

⁷ Tsin mfe tù nyit mbu mu, yôg àm, nsô àm mum ntse ndùbndùb, mum mbu bon tum,

⁸ tse ntshu yub be ntshob tatte, tse bu yub ze zwim b'a zwim tatte là.

⁹ Nsi, m'a' yob yobkwi nswe wù, m'a' ghamt'o num loṅ nsa gham;

¹⁰ wù z'o be mfà netshùa ntsho fenfen, wù z'o yôg ngafa' o David num ṅwi nge' là;

¹¹ yôg àm, tshu' àm bu bon tum tse ntshu yub be ntshob tatte, tse bu yub ze zwim b'a zwim tatte là.

¹² Bon tshag tse bandum b'a mba ntù mi a ku' ndùs'a ke' mi nke' là, bon tshag tse bènnzwi be mba tom ba' tse bo kom num nelo' nkwi ntshwèt yi là.

¹³ Nkandà mag dun, ndun nswe, num nzenze tshu ts'a ntùm bwe là; njùmbwe tshag yàm mà num mag nkônga, mbe ntsha'ntsha', mbe ntshu'ntshu'.

¹⁴ Nyàmna' tshag dun neshu, mo' ju ke' tsho' num bo, mo' ju ke' sate yube. Sàm tshu'te ke num tshag manze!

¹⁵ Mènfen b'a ngô z'a be ntùm bwe ndùlili là, mènfen b'a ngô ze Tshùaben bèn mbe Nsi bwe là.