Yobkwi 143 - NTSHOB NSI

Tshùaben, kà netsho't'àm

¹ Yobkwi David. Tshùaben, ju' le't'àm, kù' toṅ num tshàm le'te, bùnte me num yu nenùne, num yu nunetsine.

² A ke' bwô ndù o tsho'te ntsha ngafa' o, nummbe sàm mènntùn ke' be netsin mbwe o.

³ Ngakeban be nta' àm, a nyiaṅte yôg sàm nku num nsitsha'a, ngù me tswe ntùm njam, mba ben tse bo kwù matmat là.

⁴ Zwiag s'a num àm nà bi, ntù àm nke mvètte tà mà ntùm bwe.

⁵ Me be nkwimte lé'njù ts'a be mbwe là, nke nkwate nu num njoṅ mfa' mu fa, nsiaṅte nu num fa' mbu mu.

⁶ Me nyit mbu màm ntshag wù, ntù àm be mbwe o à mba dù' tsha' njum nà.

⁷ Tshùaben, se' nde mbùnte me, me b'a ntshufi, kà lem àm se o, mba me nsi be netèt ben tse bo nèn mum tô là.

⁸ Ghù ndù me ju' kondèn o fe nkebnjù, nummbe me yab ntù àm num o; ghù me lèn manze ze me zin bwe là, nummbe me ke mfà ntù àm à wù.

⁹ Tshùaben, tshu' àm bu ghakeban tshàm, me nsi lem à mbaṅ o.

¹⁰ Zi't'àm neghù ju z'o kô là, nummb'o bèn mbe Nsi àm; a bwô ndù ywèt tsho tse mebwô tshagt'àm num dù' tsha' kù'kù'.

¹¹ Tshùaben, o nsi tshùa num lén so ghù ndù me yôge; tshùa njam yu nunetsin nsô ntù àm ntùm nge'.

¹² Tshùa njam kondèn o mbiagte ghakeban tshàm. Biagte ben tse bo be ma'ni àm nà, nummbe me b'a ngafa' o.