Yobkwi 141 - NTSHOB NSI

Tshùaben, tomte ntshob màm

¹ Yobkwi David. Tshùaben, me tshwèt ntsiaṅ o, se' mbaṅ àm ndende. Kù' ntoṅ nju' nz'àm ngelaṅ me tsiaṅ o là.

² A bwô ndù yàm le'te be mbwe o mba tshu nelamte là, netshag mbu màm tù be mba ju bwôntù mfetnjù là.

³ Tshùaben, a bwô nebéb ntshu àm, ke ndôte nzendà nkub ntshu màm.

⁴ Kà bam ndù ntù àm tshob nukebwô, mbwe mfa' kebwô boa ghatshùagntù, mba ndù kà me be num yub lantô.

⁵ A be ze mèn netsin lab àm nà mb'a b'a nkôni, a be z'a naṅ ntsha num àm nà, mb'a b'a neyo' tu àm mfèt. Là, kà tshùagkèt mèn yo' tu àm mfèt; mba nukebwô tshwèt nko' ko' là, me ke nsi tsin neke nde'te Nsi.

⁶ Bo nsi tèn tshob ghatsho'te ntsha mfe num gholoṅ ma' mà nsi, bo nsi ju' mba ntshob màm bwô neshu là.

⁷ Mvôg mub nsi sate mbu' ngô fe ben mba ngelaṅ bo tshwèt ndù' tsha'a, nke ntshu' i ntu'ntu' là.

⁸ Tshùaben, Tshùaben, miag màm kaṅ nte à nze dù' o be là. Me be ndiag ndàlem à mbaṅ o. Kà ghua' yôg sàm!

⁹ Béb àm num nkù bo bùn àm yi là, mba njwi' mi ghatshùagntù bùn àm yi là.

¹⁰ A bwô ndù ghatshùagntù vù ntùm nkù tshobe, tu wul àm bémte ntôg tshàm.