Yobkwi 12 - NTSHOB NSI

Ntshob Nsi mum njù va'

¹ Ntshagte yobkwi. Num loṅ nse'e nsa fome. Yobkwi David.

² Tshùaben yôg yage, nummbe ben nelàn tshwèt mi, ben nenùn nke mi netèt bon mèn nyiaṅtu.

³ Bo be nke ntatte bo bo, tatte bèn mbe num nkub ntshu mube, bo num ntshob ntshob mèn z'a ghù ntù bàa là.

⁴ A bwô ndù Tshùaben biagte nkub ntshu mi a be ntatte là, mba lém s'a be mfùag wut netshob ka'te là.

⁵ Ben tse bo num ntshob ndù: Bag ke ndo' à lém sag nta yi, bag ghù nkub ntshu mage. We z'a nsi be ngatswite yag à?

⁶ Tshùaben tshob ndù: Mba bo tshwèt mfétte ghayennge', bwoṅbwoṅ nke mfam nà, me lo nsi ndonni neywimte mèn ze bo tshwèt mfétte là.

⁷ Ntshob Tshùaben b'a ntshob nelàne, nkàb ze bo lànt'é ntshu tô dù' ze bo fon i là, ze bo lànt'é yoṅ sammbàa là.

⁸ Wù Tshùaben, o nsi lé' ntshob mu, o lem mèn ze bo tshwèt mfétte là mbwe yen zwiaṅ benntùn ni.

⁹ Ghatshùagntù be nkatte njoṅ dù' fa. Yôg kebwô nke nèn mbwe netèt bon mèn nyiaṅtu.